Almaty qalasynyń ákimi Erbolat Dosaev Naýryzbaı, Jetisý, Medeý aýdandaryndaǵy jumys sapary barysynda jol ınfraqurylymy nysandaryna arnaıy bardy.

Qalany aralaýǵa shyqqan ákim eń aldymen Naýryzbaı aýdanyndaǵy Tastybulaq shaǵynaýdanyndaǵy joldardyń ortasha jóndeý jumystarymen tanysty, onda uzyndyǵy 8,6 shaqyrymdy quraıtyn 6 kóshede jóndeý jumystary júrip jatyr. Búginde Taýtaǵan kóshesi jóndeýden ótti. Qalǵan kósheler ınjenerlik kommýnıkasıalardyń qurylysy tolyq aıaqtalǵannan keıin jóndeledi. Osy tusta ákim týyndaǵan suraqtarǵa baılanysty tıisti basqarmalardyń jaýabyn aldy. Búgingi kúni ınjenerlik komýnıkasıalar qurylysyn júrgizetin merdiger kompanıa kelisim-shart boıynsha mindettemelerin durys oryndamaǵandyqtan, shaǵyn aýdanda jol jóndeý jumystary toqtap qalǵan. Almaty qalasy boıynsha Ekonomıkalyq tergeý departamenti qazir bul iske qatysty tergeý júrgizýde. Shahar basshysy josparlanǵan jumysty ýaqytyly ári sapaly aıaqtaý úshin jumysty jalǵastyrýdyń qosymsha josparyn qarastyrýǵa tapsyrma berdi.

Sondaı-aq qala basshysy Aqjar shaǵynaýdanyndaǵy jol qurylysy júrip jatqan aımaqqa bardy. Munda jalpy uzyndyǵy 45,3 shaqyrymdy quraıtyn 89 kóshege jańa joldar salynýda. Búgingi tańda 2,5 shaqyrymdy quraıtyn 10 kóshege asfált-beton tóseldi. Jol jóndeý jumystaryn 2023 jyldyń sońyna deıin aıaqtaý josparlanyp otyr. Ákim asfált tóseý jumystarynyń sapasyna qatysty eskertýler berip, atqarylyp jatqan jumystardyń sapasyna baqylaýdy kúsheıtýdi tapsyrdy.

Qalany aralaý kezinde Almaty ákimi Tóle bı kóshesin qala shekarasyna deıin uzartýǵa arnalǵan jol qurylys jumystarynyń barysyn tekserdi. Osyǵan oraı mamandar jumysqa daıyndyq júrgizip, jumysshylardy jumyldyrý sharalarymen aınalysýda, bul jumys 2023 jyldyń sońyna deıin aıaqtalady dep josparlanyp otyr. Erbolat Dosaev qala turǵyndarynan túsip jatqan ótinishterdi eskere otyryp, osy baǵyttaǵy jumystardy kúsheıtip, jyl sońyna deıin «Alma sıtı» turǵyn úı keshenine qatynaýdy qamtamasyz etý úshin Tóle bı kóshesin Júnisov kóshesine deıin uzartýdy tapsyrdy.

Jumys saparynyń kelesi nysany – Jetisý aýdanyndaǵy Seıfýllın dańǵyly men Jansúgirov kósheliriniń qıylysyndaǵy kólik aınalma joly. Bul nysannyń qurylysy uzaqqa sozylyp ketti, merdiger jumysty sapasyz atqarýda jáne óndiristik prosestiń jumys kestesi de buzylǵan. Osyǵan baılanysty ákim birapta ishinde merdigerge shara qoldanýdy tapsyrdy. Bul jol aıyryǵyn ýaqytynda paıdalanýǵa berý soltústik baǵyttaǵy ótkizý qabilettiligin arttyryp, Seıfýllın dańǵylynyń boıyndaǵy kólik qozǵalysyn 15-20 paıyzǵa, Jansúgirov kóshesiniń boıyndaǵy qozǵalysty 10-15 paıyzǵa arttyrýy tıis edi.

Sondaı-aq ákim Medeý aýdanynda joldardaǵy oıyqtar men jaryqshaqtardyń paıda bolýynyń aldyn alý úshin polımerli bıtým negizindegi asfált-beton qospasyn tájirıbe júzinde qoldaný barysymen tanysty. 2022 jyldyń 16-17 shildesinde Gogol kóshesiniń úsh ýchaskesindegi avtobýs jolynyń soltústik jaǵynda osy jol-qurylys materıalyn tájirıbelik paıdalaný boıynsha jumystar júrgizilgen bolatyn. Mamandar bul tehnologıanyń tıimdiligi men jabynnyń jaı-kúıin jyl boıy baqylap otyratyn bolady.

Qalany aralaý qorytyndysy boıynsha Almaty ákimi oryndalǵan jumystardyń sapasyna baqylaýdy kúsheıtip, jobalardy merziminde aıaqtaýdy tapsyrdy.