Qazaqstanda josparlanyp otyrǵan mekteptegi oqý jylyn uzartý oqýshylardyń jazǵy demalysyna áser etpeıdi, balalar 1 maýsym men 1 qyrkúıek aralyǵynda demalady. Bul týraly Oqý-aǵartý mınıstri Asqat Aımaǵambetov málim etti.
Mınıstrdiń aıtýynsha, oqý jylyn uzartýdy jaqtaıtyn sarapshylar tórtinshi toqsandy 20-25 maýsymǵa deıin sozyp, oqý jylyn 20 tamyzdan bastaýdy usynǵan. Alaıda mınıstrlik qurǵan psıholog, ata-analar men pedagogtardan turatyn jumys toby halyqaralyq tájirıbeni zerdeleı otyryp usynysty maquldamaı, balama usynys engizgen. Ol boıynsha oqý jyly ádettegideı 1 qyrkúıekte bastalyp, 31 mamyrda aıaqtalady. 1 maýsymnan balalar kanıkýlǵa shyǵady.
"Osylaısha, kanıkýlǵa shyǵý aıyrmashylyǵy 5 kúndi ǵana qurap, balalar jaz boıy demala alady. Osy rette biz sapany oqý kúnderin kóbeıtý esebinen ǵana emes, oqý júktemesin azaıtyp, oqý baǵdarlamasyn jetildirý, mamandardyń biliktiligin arttyrý arqyly da jaqsartatyn bolamyz. Jańa oqý jylynan bastap mektepterdegi oqý júktemesin azaıtý josparlanyp otyr. Al oqý jylyn uzartý – sabaq azaıatyndyqtan oqýshylarǵa qosymsha bilim alýǵa kóbirek ýaqyt arnaýyna múmkindik beredi" dedi Aımaǵambetov óziniń blogyna kelip túsken ótinishke bergen jaýabynda.
Buǵan deıin eldegi oqý jylyn eki aptaǵa uzartý josparlanyp otyrǵany habarlanǵan. Mınıstrlik oqý jylynyń uzaqtyǵyn 1-synyptar úshin 35, (qazir 33 apta), 2-11 (12)-synyptar úshin 36 oqý aptasynan (qazir 34 apta) turatyndaı etip uzartýdy kózdep otyr.
Pikir qaldyrý