«AMANAT» partıasy janyndaǵy «Jer amanaty» komısıasy Jetisý oblysynda boldy. Kóshpeli keńes qorytyndysy boıynsha, óńirde 41 myń gektardan astam jaıylymdyq jer memleket menshigine qaıtaryldy, dep habarlady partıanyń baspasóz qyzmeti.

Komısıa músheleri – partıa hatshysy Dáýlet Káribek, zańger Baqytjan Bazarbek, «AMANAT» partıasynyń atynan saılanǵan Májilis depýtaty Janarbek Áshimjan, ASHM Jer resýrstaryn basqarý komıtetiniń tóraǵasy Murat Temirjanov Kerbulaq, Eskeldi jáne Kóksý aýdandarynyń turǵyndarymen kezdesip, jer qatynastary salasyndaǵy ózekti máselelerdi talqylady.

Partıa hatshysy Dáýlet Káribek atalǵan jumys elimizdiń barlyq óńirinde júrgizilip jatqanyn atap ótti.

«Memleket basshysy Qasym-Jomart Toqaev ıgerilmeı jatqan jaıylymdyq jerlerdi memleket menshigine qaıtarý týraly naqty tapsyrma berdi. Prezıdent aıtyp ótken áleýmettik ádilettilikti qamtamasyz etý máselesi «AMANAT» partıasynyń negizgi basymdyqtarynyń biri sanalady. Árbir aýyl turǵynynyń pikirin eskerýge tyrysamyz jáne jaıylymdyq jerler ádil bólinýi úshin barymyzdy salamyz», – dep atap ótti Dáýlet Káribek.

Óz kezeginde, Labazy aýylynyń turǵyny Qızat Abırov búginde jaıylymdyq jerlerdiń tapshylyǵy burynǵydan da kóp sezilip otyrǵanyn aıtty.

«Aýylda turyp, mal baǵyp otyrǵandar úshin bul birinshi kezektegi másele. Kóksý aýdanynda 6 myń gektardan astam jer qaıtaryldy. Sondyqtan osy komısıanyń jumysyna úlken úmit artamyz», – dep tolyqtyrdy Qızat Abırov.

Esterińizge sala keteıik, partıa janynan «Jer amanaty» komısıasy qurylǵan bolatyn. Sońǵy birneshe aıda komısıanyń kúshimen Qaraǵandy, Jambyl, Túrkistan jáne Aqtóbe oblystaryndaǵy 160 myń gektardan astam jaıylymdyq jer memleket menshigine qaıtaryldy.