Qazaqstan Ulttyq Banki 27 shildeden bastap "Este qalatyn oqıǵalar men birtýar adamdar" atty monetalar serıasynan "ROZA BAǴLANOVA. 100 JYL" koleksıalyq monetalarynyń satylymǵa shyǵatynyn habarlady.

"Este qalatyn oqıǵalar men birtýar adamdar" serıasy boıynsha shyqqan 100 teńgelik moneta Roza Baǵlanovanyń 100 jyldyǵyna arnalǵan.

Monetalar www.kazcoins.nationalbank.kz platformasynda Ulttyq banktiń ınternet-dúkeni arqyly satylatyn bolady. 

"ROZA BAǴLANOVA. 100 JYL" koleksıalyq monetasynyń sıpattamasy

Moneta aversiniń ortalyq bóliginde Qazaqstan Respýblıkasynyń Memlekettik eltańbasy beınelengen. Eltańbanyń oń jaǵy men sol jaǵynda oıý-órnek elementteri ornalasqan. «QAZAQSTAN ULTTYQ BANKI • NATIONAL BANK OF KAZAKHSTAN» degen jazý moneta jıegimen aınaldyra jazylǵan. Tómengi bóliginen monetanyń nomınalyn bildiretin «100 TEŃGE» jazýdy kórýge bolady.

Moneta reversinde Roza Baǵlanovanyń sýreti, portrettiń sol jaǵynda mereıtoılyq datany bildiretin «100 JYL» degen jazý bar, moneta jıeginde «Ah, Samara-gorodok» ániniń notalary, «ROZA BAǴLANOVA» degen jazýlar aınaldyra basylǵan, sol jaǵynda – monetanyń shyqqan jylyn bildiretin «2022» degen jazý bar.

MN25 qospasynan jasalǵan nomınaly 100 teńgelik monetanyń massasy – 15 gram, dıametri – 33 mm, daıyndaý sapasy – «brilliant uncirculated», taralymy – 15 000 dana.

Moneta koleksıalyq quny turǵysynan satýǵa arnalǵan. Olar belgilengen qunyna saı Qazaqstan Respýblıkasynyń búkil aýmaǵynda barlyq tólem túri boıynsha, sondaı-aq bank shottaryna esepteý úshin, Qazaqstan Respýblıkasynyń barlyq bankterinde aýdarý, usaqtaý jáne aıyrbastaý úshin qabyldanady.

Koleksıalyq moneta Qazaqstannyń teńge saraıynda jasalǵan.