Polısıa qańtar aıyndaǵy oqıǵalar boıynsha barlyǵy 4642 qylmystyq is qozǵaǵan. Onyń 2 jarym myńnan astamy – urlyq derekteri, 708 is qarýdy urlaý nemese saqtaý faktisi boıynsha, 418 is buzaqylyq, 199 is múlikti joıý faktisi, 26 is qaraqshylyq jáne tonaý derekteri boıynsha qozǵalǵan. Bul týraly ortalyq komýnıkasıalar qyzmetindegi brıfıńte İshki İster mınstrligi tergeý departamentiniń bastyǵynyń orynbasary Qojaev Muhtar Jumabaıuly málim etti.

Osy qylmystyq ister aıasynda polısıa tergeýshileri 15 myńǵa jýyq adamnan jaýap alǵan. 35 myńnan astam tergeý áreketter jáne 2 jarym myńdaı saraptama júrgizgen. 1731 azamat jábirenýshi bolyp tanylǵan.

"343 mln teńgeden astam somaǵa shyǵyndy óteý qamtamasyz etildi. 969 isti tergeý aıaqtaldy. Onyń ishinde 594 aıyptalýshyǵa qatysty ister sottarǵa joldandy. Sotta 500 adamǵa úkim shyqty. 398 adamnyń bas bostandyǵy shekteldi. Al aýyr jáne asa aýyr qylmys jasaǵany úshin 92 adam bas bostandyǵynan aıyryldy. Qazir polısıa tergeýshileriniń óndirisinde 289 qylmystyq is bar. Onyń ishinde 20-sy boıynsha 27 kúdikti anyqtalǵan. Olardyń 6-ýy kúzetpen qamaýda ustalýda" dedi Muhtar Jumabaıuly.

Sonymen qatar ol tergeý satysynda jaǵymdy minezdelgen jáne jábirenýshilerge keltirgen shyǵyndy ótegen kúdiktilerdiń bultartpaý sharalary qoǵamnan oqshaýlaýǵa baılanysty emes bolyp ózgertilgenin atap ótti.

Osy boıynsha 255 kúdikti qamaýdan bosatylǵan. Ortasha, onsha emes aýyr qylmys jasaǵan 35 kúdiktige qatysty qylmystyq ister sotqa jetkizilmeı taraptardyń tatýlasýyna baılanysty qysqartylsa, dál osyndaı negizdermen 13 sottalýshyǵa qatysty ister sot tarapynan qysqartylǵan.