Ýkraına prezıdenti Vladımır Zelenskıı Reseı áýebazasyndaǵy serıalyq jarylystardan keıin Reseı 2014 jyly anneksıalap alǵan Qyrymǵa baılanysty senimdi málimdeme jasady.

Seısenbide Qyrymnyń batysyndaǵy Novofedorovka eldimekenindegi áskerı áýebazada serıalyq jarylystar bolǵan. Ýkraına áýe kúshteri jarylys bolǵan bazadaǵy "Sakı" áýejaıynda Reseıdiń toǵyz ushaǵynyń kózi joıylǵanyn málim etti. Bazany Reseı Ýkraınanyń ishki jaǵyna soqqy jasaý úshin qoldanyp kelgen.

VVS-diń jazýynsha, jarylysqa baılanysty qos tarap taratqan aqparat ártúrli. Reseı qorǵanys mınıstrligi jarylys oq-dárilerdiń otqa oranýy saldarynan boldy dese, resmı Kıev jarylysqa qatysy joq ekenin aıtady.

Soǵysty zertteýmen aınalysatyn ISW ortalyǵy Reseı óziniń áýe qorǵanysy nashar ekenin áshkere etip almas úshin jarylysqa Ýkraınany aıyptaı almaı otyrǵanyn habarlady.

Ótken aıda Reseıdiń eks-prezıdenti Dmıtrıı Medvedev Ýkraına Qyrymǵa shabýyldaıtyn bolsa, qıamet kúni ornaıtynyn málim etkennen keıin sarapshylar Qyrymǵa shabýylǵa Máskeý úlken kúshpen jaýap berýi múmkin ekenin jetkizgen.

Ýkraına prezıdenti de kezekti sózinde jarylys týraly eshnárse demedi, biraq Qyrym týraly senimdi málimdemeler jasady.

"Biz Reseı soǵysy Qyrymdy basyp alýdan bastalǵanyn umytpaımyz. Bul soǵys endi Qyrymnyń azat etilýimen aıaqtalýy kerek" dedi ol.

Zelenskıı buǵan deıin Reseı soǵys bastalǵan 24 aqpanǵa deıingi pozısıasyna qaıtyp kelse, beıbitshilikti ornatýǵa kelisetinin aıtqan. Endi 24 aqpanǵa deıin Reseı qaramaǵynda bolyp kelgen Qyrym máselesin qozǵap otyr. Onyń mundaı batyl málimdemesi urys maıdanynda Ýkraına kúshteri basymdyqqa ıe bolyp jatqanyn aıǵaqtaýy yqtımal. Qazirgi tańda áskerı qaqtyǵystar negizinen Ýkraınanyń shyǵysynda bolyp jatyr.