Májilis tóraǵasynyń orynbasary Pavel Kazansev, Májilis depýtaty Eldos Abaqanov «AMANAT» partıasynyń ókilderimen birge Nur-Sultan qalasyndaǵy «Zarechnyı» turǵyn alabynyń turǵyndarymen kezdesti. Onda talqylanǵan basty másele mektep qurylysy týraly boldy.

Májilis tóraǵasy orynbasarynyń aıtýynsha, elordanyń qarqyndy damyp kele jatqanyna qaramastan, Zarechnyı alabynda áli kúnge deıin mektep salynbaǵan. №45 orta mekteptiń salynǵanyna 34 jyl bolǵan. Búginde 400 balany ǵana qamtı alatyn mektepte 800-ge jýyq bala bilim alýda.

«Kezdesýde birqatar qalalyq, tipti respýblıkalyq deńgeıdegi  máseleler kóterildi. Qalalyq deńgeıdegi problema – ol qurylys, kóshelerdi keńeıtý, komýnıkasıalyq máseleler jáne t.b. Barlyq máselelerdi jazyp aldyq, baqylaýǵa alamyz», – dedi májilis vıse-spıkeri Pavel Kazansev.

Májilis tóraǵasynyń aıtýynsha, turǵyndar tarapynan kóterip jatqan suraqtardyń basym bóligi jergilikti atqarýshy organdardyń deńgeıinde sheshiletin másele.

Óz kezeginde Eldos Abaqanov: «Eń kóp kóterilgen suraq -  «mektep qashan salynady?». Mektep bul aýdanǵa árıne jetkiliksiz, odan bólek mektepaldy daıarlyq klasstarynda jaýyp tastaǵan. Bizdiń maqsat – barlyq problemalardy tikeleı estip, olardyń sheshý joldaryn oılastyrý. Ár suraq boıynsha jeke-jeke jumys jasaıtyn bolamyz. Kezdesý aıasynda aıtylǵan jáne olardyń sheshý joldary baqylaýǵa alynatyn bolady», – dedi.

Turǵyndar depýtattarǵa aýdandaǵy salynyp jatqan turǵyn úı keshenderiniń sany mektep pen balabaqshalarǵa saı bolýy kerek degen pikirlerin aıtty.

Májilistiń baspasóz qyzmeti