«AMANAT» partıasy janyndaǵy «Jer amanaty» komısıasy Aqmola oblysyna bardy. Sonyń nátıjesinde memleket menshigine 60 myń gektar jaıylymdyq jer qaıtaryldy. Endi bul jer ýchaskelerin aýyl turǵyndary mal jaıý jáne shóp shabý úshin paıdalanatyn bolady.

Memleket basshysy Qasym-Jomart Toqaev buǵan deıin paıdalanylmaı jatqan jaıylymdyq jerlerdi memleket menshigine qaıtarý jóninde naqty tapsyrma bergen bolatyn.

«AMANAT» partıasynyń Hatshysy Dáýlet Káribek aýyl sharýashylyǵy taýar óndirýshilerimen memorandým jasalǵanyn atap ótti. Soǵan sáıkes, sharýalar 333 myń gektar jerdi budan bylaı aýyl turǵyndarymen birlesip paıdalanady.

«Aqmola oblysynyń turǵyndary úshin jaıylym jerdiń jetispeýshiligi óte ózekti másele bolyp otyr. Sondyqtan komısıa músheleri munda belsendi jumys istep jatyr. Memlekettik organdarmen jáne iri menshik ıelerimen birlesip qabyldaǵan sheshimderdiń oryndalý barysyna monıtorıń júrgizýdi jalǵastyramyz», – dedi komısıa múshesi, qoǵam qaıratkeri Ǵalym Baıtoq.

Tanymal jýrnalıs, komısıa múshesi Maqsat Tolyqbaıdyń aıtýynsha, komısıa ókilderi 3 aıdan beri óńirlerdi aralap keledi.

«Memlekettik organdardyń ókilderi men partıalyqtardan bólek, komısıa quramynda qoǵam belsendileri jáne zańgerler bar. Jaıylym máselesi uzaq ýaqyt boıy qordalanyp keldi. Ony bir kúnde sheshý múmkin emes. Sondyqtan partıanyń barlyq tetigin iske qosyp, ár oblystaǵy máseleni birlesip sheship kelemiz», – dedi Maqsat Tolyqbaı.

Atbasar aýdany Sochınskoe aýylynyń turǵyny Asylhan Tastemirov eldi mekenge bekitilgen 6 myń gektar jaıylymnyń azdyq etip otyrǵanyn jetkizdi.

«Aýylda 200-ge jýyq úı bar. Turǵyndardyń barlyǵy derlik mal sharýashylyǵymen aınalysady. Aýyl halqy iri qara, jylqy ósirip jan baǵyp otyr. Jaıylym máselesi óte ózekti. Komısıa osy máseleni sheshýge kómektesedi dep úmittenemiz», – dedi Asylhan Tastemirov.

Osy kúni «Jer amanaty» komısıasynyń músheleri Sandyqtaý aýdanynda jer máselesi boıynsha azamattardy qabyldady. Turǵyndar tarapynan aıtylǵan barlyq másele partıalyq baqylaýǵa alyndy.

Aıta keteıik, keıingi birneshe aı ishinde komısıa músheleri Jetisý, Qaraǵandy, Qostanaı, Jambyl, Túrkistan, Aqtóbe jáne Soltústik Qazaqstan oblystarynda boldy. Jalpy, «Jer amanaty» komısıasynyń kómegimen 350 myń gektardan astam jer memlekettik menshikke qaıtaryldy.

Jer máselelerin neǵurlym jedel sheshý úshin qazaqstandyqtar barlyq zań buzý faktileri týraly «AMANAT» partıasynyń «Jedel jeli» 8 800 080 44 41 telefonyna habarlaı alady. Ótinimder WhatsApp arqyly da +7 700 800 44 41 nómir boıynsha qabyldanady.