Májilis depýtattary Berik Bekjanov, Berik Ospanov pen Fahrıddın Qarataev Shymkent qalasyna baryp, Ál-Farabı aýdandyq jumyspen qamtý ortalyǵynyń ujymymen kezdesti.

​Búgingi tańda halyqty jumyspen qamtý ortalyǵy elimizdegi jumyssyz azamattardy jumyspen qamtýǵa járdem kórsetip, eńbekpenqamtýdyń belsendi sharalaryn iske asyrady. Sondaı-aq bos oryndar jármeńkesin uıymdastyryp, kásiptik baǵdar berýdi júrgizedi.

Shymkent qalalyq jumyspen qamtý jáne áleýmettik qorǵaý basqarmasynyń basshysy Balmarjan Narbekova atap ótkendeı, aýdandyq ortalyqta búginde 20 qyzmetker qala turǵyndaryna qyzmet kórsetýde. Megapolıs statýsyn alǵaly qaladaǵy tórt aýdanda aýdandyq jumyspen qamtý ortalyqtary ashylyp, osy baǵytta sharalardy iske asyryp keledi. Ortalyqqa 18 jastan bastap zeınetker jasyna deıingi jumyssyz azamattar kelip, júginýge quqyly.

​Óz kezeginde Májilis depýtattary «AMANAT» partıasynyń 2021-2025 jyldarǵa arnalǵan saılaýaldy baǵdarlamasyn iske asyrý maqsatynda daıyndalǵan Jol kartasyn tıimdi júzege asyrý máselelerin pysyqtap, ataýly áleýmettik kómek taǵaıyndalǵan turǵyndar týraly keńinen aqparat aldy.

​B.Bekjanovtyń aıtýynsha, ortalyq eńbek naryǵynda suranysqa ıe mamandyqtar boıynsha qysqa merzimdi kásiptik oqytýdy joǵary deńgeıde uıymdastyrǵan.

​Kezdesý barysynda jol kartasynda josparlanǵan agrokeshen aımaǵyn salý, jylyjaı, sondaı-aq, stýdentterge arnalǵan jataqhanalardy ýaqytyly salý máseleleri talqylandy.

​Osy kúni Májilis depýtaty Tilektes Adambekov Qaraǵandy oblysyndaǵy Abaı shahtasyna baryp, eńbek ujymymen kezdesti. Jıynda shahterler zeınetkerlik jasty tómendetý men eldegi azyq-túlik pen jyljymaıtyn múlik baǵasynyń ósýine shaǵymdandy.

​Tilektes Adambekov zeınetkerlik jasty ózgertý máselesi Úkimette de, depýtattyq korpýsta da qaralyp jatqanyn jetkizdi.