Almatyda 24 jastaǵy kelinshek pen onymen birge turatyn 21 jastaǵy er adam dúnıege kelgenine alty kún bolǵan qyzdaryn satpaq bolǵan. Qazirgi ýaqytta qylmys jasady degen kúdikpen jeti adam qamaýǵa alyndy. Bul týraly ishki ister mınıstrliginiń resmı ınternet resýrsy habarlady.

Almaty qalasy polısıa departamentiniń málimetinshe, jup qursaqtaǵy balasyn satyp alýshylardy eki aı buryn izdeı bastaǵan.

– Balany Almaty qalasynyń turǵyndary – 48 jastaǵy Ý.esimdi azamat pen 46 jastaǵy E.esimdi azamatsha alǵysy kelgen. Taraptar 2 mıllıon teńgege kelisken. Mámile ótken demalysta jasaldy. Alaıda Krımınaldyq polısıa jáne Uıymdasqan qylmyspen kúres basqarmalary qyzmetkerleriniń qalanyń ár jerinde bir ýaqytta júrgizgen arnaıy is-sharasy kúdiktilerdiń josparyn buzdy. Alǵashqylardyń qatarynda qyzdyń bıologıalyq ata-anasy ustaldy. Odan keıin yqtımaldy satyp alýshylar jáne erli-zaıypty deldaldar ustaldy. Artynsha aqshalaı syıaqy úshin balanyń qujattaryn rásimdeý mindetin óz moınyna alǵan 56 jastaǵy A. esimdi azamatsha ustaldy, – dedi Polısıa departamenti bastyǵynyń orynbasary Dıdar Ahanov.

Dıdar Ahanovtyń aıtýynsha, kezdesý kezinde deldaldardyń qolynda úsh jáne bir aılyq taǵy eki sábıi bolǵan.

– Er adam bular ózderiniń balalary ekenin aıta bastady. Alaıda olar balalardyń jeke basyn kýálandyratyn qujatty kórsete almady. Osylaısha, osy arnaıy is-sharanyń nátıjesinde kúdiktilerden úsh sábı alyndy. Olar medısınalyq mekemege tekserilý jáne qajet bolǵan jaǵdaıda kómek kórsetý úshin jetkizildi. Kúdiktiler bul balalardy "tiri" taýar retinde paıdalanýy múmkin ekenin joqqa shyǵarmaımyz. Tergeý mindetti túrde shyndyqty anyqtaıtyn bolady, – dedi Ahanov.