«AMANAT» partıasynyń Atqarýshy hatshysy Asqat Oralov Mańǵystaý oblysynda jurtshylyqpen, aýyldyq okrýg turǵyndarymen, bastaýysh partıa uıymdarynyń basshylarymen birqatar kezdesýler gótkizdi. Sondaı-aq, partıanyń saılaýaldy baǵdarlamasyn iske asyrý aıasynda salynyp jatqan áleýmettik nysandardyń qurylys barysyn tekserdi. 

Asqat Oralov Májilis depýtaty Edil Jańbyrshınmen, Aýyl sharýashylyǵy vıse-mınıstri Ábilhaıyr Tamabekpen, qoǵam qaıratkeri Murat Ábenovpen jáne «Jer amanaty» komısıasynyń ózge de múshelerimen birge Taýshyq aýylynda Túpqaraǵan aýdanynyń turǵyndarymen kezdesip, jaıylymdyq jerlerdiń jetispeýshiligi jáne qunarsyzdanýy máselelerin talqylady. 

Aýyl aqsaqaly Amangeldi Júnbasovtyń aıtýynsha, aýyl turǵyndarynyń mal jaıatyn jeri bolmaı otyr. Al, jaqyn mańdaǵy jaıylymdardyń menshik ıeleri jergilikti turǵyndardyń mal jaıýyna ruqsat etpeıdi. Sondyqtan jeke qosalqy sharýashylyqtarǵa arnalǵan jaıylymdardyń aýmaǵyn keńeıtý máselesi ózekti bolyp otyr.

«AMANAT» partıasy Memleket basshysynyń qoǵamdyq tiregi retinde Jańa, Ádiletti Qazaqstandy qurý jumysyna úlken úles qosyp keledi. Prezıdenttiń paıdalanylmaı jatqan jaıylymdyq jerlerdi memleket menshigine qaıtarý jónindegi tapsyrmasy oryndalyp jatyr. Sonyń naqty dáleli: «Jer amanaty» komısıasynyń atsalysýymen Mańǵystaý oblysynda 240 000 gektar jer memleketke qaıtaryldy. Bul jumysty elimizdiń barlyq aımaǵynda jalǵastyramyz», – dep atap ótti Asqat Oralov. 

Óz kezeginde, Májilistegi «AMANAT» fraksıasynyń depýtaty Edil Jańbyrshın quramyna Aýyl sharýashylyǵy mınıstrliginiń, prokýratýranyń ókilderi, partıa depýtattary, zańgerler, qoǵam qaıratkerleri, jýrnalıser kiretin komısıanyń kómegimen segiz óńirde memleket menshigine 350 myń gektardan astam aýyl sharýashylyǵy jeri qaıtarylǵanyn atap ótti. 

Budan soń, partıanyń Atqarýshy hatshysy Munaıly aýdany Basqudyq aýylynda 600 oryndyq mekteptiń qurylys barysyn tekserdi. Jańa bilim oshaǵy «AMANAT»-tyń saılaýaldy baǵdarlamasyn iske asyrý aıasynda salynyp jatyr. Bıyl mektep paıdalanýǵa berilgennen keıin, aýylda úsh aýysymda bilim berý jáne balalardy ózge aýyldardyń mektepterine alyp baryp otyrý máselesi sheshiledi.

Sondaı-aq, Asqat Oralov Aqtaý qalasynyń 19A shaǵyn aýdanyndaǵy 432 páterlik kóp qabatty úılerdiń qurylysymen tanysty. Nysan qurylysyn jyl sońyna deıin aıaqtaý josparlanyp otyr. Partıanyń saılaýaldy ýádelerine sáıkes, turǵyn úı kezekte turǵandarǵa, sonyń ishinde halyqtyń osal tobyna bólinedi.

Eki nysanda da qurylys sapasyn, bólingen qarajattyń tıimdi ıgerilýin, qaýipsizdik tehnıkasy erejeleriniń saqtalýyn jáne jumysshylardyń áleýmettik jaǵdaıyn qadaǵalaıtyn partıalyq baqylaý beketteri ashylǵanyn atap ótken jón.

Sol kúni «AMANAT»-tyń Atqarýshy hatshysy oblystaǵy bastaýysh partıa uıymdarynyń basshylarymen kezdesti. Búginde óńirde 16 myńnan astam partıa múshelerin biriktiretin 102 BPU jumys isteıdi.

«Mundaı kezdesýler amanattyqtardy tolǵandyratyn máselelerdi bilip otyrýǵa múmkindik beredi. Sebebi, bastaýysh partıa uıymdary – partıanyń negizi. Sonymen qatar, partıanyń jańa Saıası tuǵyrnamasyn ázirleý kezinde qatardaǵy partıa músheleriniń pikiri eskeriledi. Búginde BPU-ny irilendirý, olardyń áleýetin kúsheıtý jóninde jumys júrgizilýde. BPU bastamalaryn qoldaý maqsatynda jergilikti jerlerde jobalardy iske asyrý úshin partıalyq jarnalardyń 20%-yn qaıtaryp berý tájirıbesin engizdik», – dedi Asqat Oralov.