"Toqaev Nazarbaevtyń stılinde kezekten tys prezıdent saılaýyn jarıalady. Ýaqyt tyǵyz. Árıne, yńǵaısyz adamdardy Ortalyq saılaý komısıasy tirkemes. Bir bále tabady ǵoı. Biraq, men 2019 jyly bar resmı prosedýradan ótkenmin. Iá, Áblázov, Qajygeldın, ıýtýbtaǵy basqa eski opozısıa meni qaralady, biraq erteń basqa bılik qarsylasyn tirkese, qoldaımyn. Tirkemese, prezıdenttikke usynylyp, tirkelýge men daıyn, óıtkeni tirkelý úshin zań jaǵynan minsizbin" dep jazdy ol facebook  paraqshasynda.

 

2019 jylǵy saılaýda 70,96 % paıyzben Qasym-Jomart Toqaev jeńiske jetken. Opozısıalyq saıasatker Ámirjan Qosanov saılaýshylar daýsynyń 16,23 % paıyzyn jınap, ekinshi satyǵa jaıǵasty. Alaıda Qosanov resmı derekten áldeqaıda kóp daýys jınady dep sanaıtyndar kóp. Saılaýdyń resmı qorytyndysy shyqpaı turyp, ekzıt-poll nátıjesi jarıalanǵanda Qosanov aldyn ala qorytyndymen keliskendeı, Toqaevty jeńisimen quttyqtaıdy. Bul – onyń jaqtastary men oǵan daýys bergender arasynda narazylyq týdyryp, "Qosanov saılaý nátıjesimen kelispeı, saılaýshylar daýsy úshin kúresýi kerek edi, qorytyndy shyqpaı jatyp berilgeni bıliktiń jobasy bolǵany" degen sarynda pikirler aıtyldy. Sodan beri qoǵamda Qosanov, "bıliktiń jobasy" sózderi qatar atalatyn boldy. Qosanovtyń ózi saılaýshylar daýsy úshin kúrespeýin "halyqty kóshege bastap shyqsam, qan tógiler edi, men Jańaózen qyrǵynyn kórgen adammyn, eshkimniń qanyn moınyma júkteı almaımyn" dep bılik halyq narazylyǵyn janshý úshin bárine baratynyn aıtqan.