İshki ister mınıstrligi tergeý departamentiniń basqarma basshysy Ermek Shúlden ormandy qasaqana joıý nemese zaqymdaǵany úshin múlkin tárkileı otyryp, 8 jylǵa deıin bas bostandyǵynan aıyrý jazasy qarastyrylǵanyn málimdedi. 

«QR İshki ister mınıstrligi qoldanystaǵy zańnamaǵa sáıkes, ormandardy joıý nemese zaqymdaǵany úshin qylmystyq jaýapkershilik kózdelgenin eskertedi. Orman qoryna kiretin jáne kirmeıtin aǵashtar men butalardy órt qoıý arqyly nemese qoqyspen lastap, ózge de áreketpen qasaqana joıý nemese zaqymdaý QR Qylmystyq kodeksiniń 341-babymen saralanady. Atalǵan áreket aýyr qylmystar sanatyna jatady jáne ol úshin múlkin tárkileı otyryp, 8 jylǵa deıin bas bostandyǵynan aıyrý jazasy kózdelgen», - dedi Ermek Shúlden.

Eske salaıyq, 2 qyrkúıekte Qostanaı oblysynyń Áýlıekól aýdanynda orman órtendi. Oblystaǵy 5 aımaqta órt sóndirý jumystary áli jalǵasyp jatyr. Órtten 10 adam aýyr jáne jeńil jaraqattar alyp, 1 adam qaza tapqan.