Kúzde ótetin kezekten tys prezıdent saılaýyna shamamen 20 mlrd teńge qarjy bólinedi. Bul týraly májilistegi BAQ ókilderine arnalǵan alańda Qarjy vıse-mınıstri Tatána Saveleva habarlady. 

Vıse-mınıstr o basta saılaý ótkizý 2024 jylǵa josparlanǵandyqtan, boıýdjet te sol jylǵa josparlanǵanyn aıtty. 

"Engizilgen ózgerister men jańa tapsyrmalardy eskere otyryp, bıyl prezıdent saılaýyna úkimet rezervinen qarajat bólinedi. Qazir OSK 20 mıllıard teńgege jýyq qarajat ketetinin eseptep otyr", - dedi Tatána Saveleva. 

Qarjy vıse-mınıstri parlament saılaýy úshin 25 mlrd teńge qarajat jumsalýy múmkin ekenin aıtty. 

Onyń aıtýynsha, shyǵynnyń 90 paıyzǵa jýyǵy komısıa músheleriniń jalaqysyna ketedi. 

"Ótken saılaýǵa 65 myń adam qatysty. Bıyl olardyń sany 70 myńnan asady. Olardyń jalaqysy eń tómengi jalaqyny esepke ala otyryp eseptelip otyr. Olardyń jalaqysyn esepteý eń tómengi jalaqyǵa negizdeledi. 2019 jyly saılaý ótkizgende 42 500 bolsa, bıyl 60 000 teńge boldy. Parlament saılaýyna da shamamen osynshama shyǵyn qarastyrylǵan. biraq kelesi jyly eń tómengi jalaqy 70 myń teńge bolatynyn eskersek, bul shamamen 25 mıllıard teńgeni quraıdy", - dedi vıse-mınıstr.