Almaty ákimi Erbolat Dosaev pen Halyqaralyq hokeı federasıasynyń prezıdenti Lúk Tardıf 2027 jyly Almatyda shaıbaly hokeıden álem chempıonatyn ótkizý perspektıvalaryn talqylady. Bul týraly Almaty qalasy ákiminiń baspasóz qyzmeti habarlady.
Halyqaralyq hokeı federasıasynyń prezıdenti Lúk Tardıftiń, Qazaqstan hokeı federasıasynyń basshysy Asqar Mamınniń, Halyqaralyq hokeı federasıasynyń ókilderi vıse-prezıdent Petr Brızdiń jáne Bas hatshy Mattı Nurmınniń qatysýymen ótken kezdesýde 2027 jyly Astanada jáne Almatyda hokeıden álem chempıonatyn ótkizý múmkindigi talqylandy.
Qazaqstan prezıdenti Qasym-Jomart Toqaev 2027 jyly 15 qyrkúıekte Lúk Tardıfpen ótken kezdesýde hokeıden álemdik birinshilikti qabyldaýǵa daıyn ekenin rastady. Álem chempıonatyn ótkizý úshin qojaıyn eldiń tańdaýy boıynsha daýys berý 2023 jyldyń mamyr aıynda ótedi.
Kezdesý barysynda Erbolat Dosaev Almatynyń 2011 jylǵy Qysqy Azıa oıyndary, 2017 jylǵy qysqy Dúnıejúzilik ýnıversıada, álem chempıonattary, ártúrli sport túrleri boıynsha Álem kýbogynyń kezeńderi jáne t. b. sıaqty iri sporttyq is-sharalardy ótkizýdegi baı tájirıbesi týraly aıtyp berdi.
Qala basshysy megapolıstiń Almatyda hokeıden álem chempıonatyn ótkizýge daıyndyǵyn, qajetti damyǵan sporttyq jáne qonaq úı ınfraqurylymynyń bar ekenin rastady. Búginde qalada "Medeý" muz aıdyny, "Almaty Arena" jáne "Halyq Arena" muz saraılary, "Suńqar" Halyqaralyq shańǵy tramplınderi kesheni, Balýan Sholaq atyndaǵy Sport saraıy, sondaı-aq Almaty aglomerasıasynyń aýmaǵyndaǵy birqatar taý shańǵysy kýrorttary sıaqty qysqy sport túrlerimen aınalysýǵa arnalǵan sport keshenderi jumys isteıdi.
Kezdesýge qatysýshylardyń pikirinshe, Qazaqstanda hokeıden álem chempıonatyn ótkizý onyń eldik deńgeıde tanymal bolýyna serpin beredi, al halyqaralyq deńgeıde - búkil Azıa óńirinde osy qysqy sport túrin qoldaýshylar sanyn arttyrady.
Halyqaralyq hokeı federasıasynyń prezıdenti Lúk Tardıf bul onyń Almatyǵa ekinshi sapary ekenin jáne qatysýshy komandalar úshin de, búkil álemniń jankúıerleri úshin de kóptegen qyzyqty oryndar bar ekenin atap ótti. Qala álem chempıonaty toptarynyń birin ótkizýge laıyqty jáne Qazaqstan hokeı federasıasy ákimdikpen birlesip, ótinim berý naýqanyna sapaly daıyndalýy tıis.
