Japonıany sý basyp jatyr. Sońǵy ondaǵan jylda bolmaǵan taıfýn adamnyń ómirin qıǵan, kemi 90 adam jaralanǵan, dep jazady VVS.
Qaza tapqandardyń biri kóligimen birge sýǵa ketse, biri kóshkinnen qıraǵan úı ishinde mert bolǵan. Jergilikti bılik 9 mıllıon turǵyndy kóshirgeli jatyr.
Jeksenbide eldiń ońtústigindegi Kúsú aralyna basyp kirgen Nanmadol taıfýny saǵatyna 234 shaqyrym jyldamdyqpen soǵatyn jel men jaýyn ákelgen. Saldarynan úıler qırap, transport pen ónerkásip oryndarynyń jumysy toqtaǵan.
El astanasy Tokıo nóser asynda qalyp, Tozai metro jelisi toqtatylǵan. Asa joǵary jyldamdyqpen júretin poıyzdar, poromdar men ushaqtardyń da qozǵalysy toqtap tur. Dúkender istemeıdi.
Eldiń premer-mınıstr Fýmıo Kısıda BUU Bas Assambleıasynda sóıleý úshin barmaq bolǵan Nú-Iorkke saparynan bas tartty.
Sınoptıkter daýyl shyǵysqa qaraı oıysyp Honsú aralyn basyp ótetinin, sársenbi teńizge qaraı soǵatynyn aıtady.
Pikir qaldyrý