Syrtqy ister mınıstrliginiń resmı ókili Aıbek Smadıarov Qazaqstan separatıstik Donesk pen Lýgansk halyq respýblıkalary (Donbass) men Ýkraınanyń Herson jáne Zaporoj oblystaryn Reseıge qosý boıynsha ótip jatqan referendým nátıjesin moıyndamaıtynyn meńzedi.
Aıbek Smadıarovtyń pikiri anyq ári naqty bolmaǵanymen, ol Qazaqstan aýmaqtyq tutastyq, halyqaralyq quqyq qaǵıdalaryn berik ustanatynyn atap ótti. Osy prınsıpterge súıengen batys elderi referendýmdy legıtımdi emes dep, nátıjesin moıyndamaıtynyn málim etken.
Ózin táýelsiz dep jarıalaǵan DHR men LHR turǵyndaryna "Reseı Federasıasynyń qataryna qosylýdy qalaısyz ba" degen mazmundaǵy bir ǵana saýal qoıylady. Al basyp alynǵan Zaporoj ben Herson oblystary azamataryna úsh saýal qoılady. Olar Ýkraına quramynan shyǵý, jeke memleket retinde oblys bolyp qurylý jáne Reseı Federasıasynyń quramyna qosylý týraly bolmaq.
Batys sarapshylary Kreml referendým arqyly joǵaryda atalǵan aımaqtardy ózine qosyp alǵannan keıin, Ýkraınanyń azat etý kúresin ózine jasalǵan agresıa retinde baǵalap, jalpyhalyqtyq mobılısasıa jarıalaýy múmkin ekenin aıtady. Sarapshylar tipti ıadrolyq qarý qoldaný qateri arta túsýi múmkindigin de joqqa shyǵarmaıdy.
Pikir qaldyrý