Kóshi-qon qyzmeti sheteldik azamattardy páterine alǵan tulǵalar sheteldiktiń kelgeni týraly habarlaýǵa mindetti ekenin eskertti, dep jazady Polisia.kz.
Imıgranttardyń kelýi men elde bolýy jónindegi qaǵıdalardyń 9-tarmaǵyna sáıkes, páter ıeleri men qonaq úı, pansıonat basshylary sheteldik azamattyń kelgenin ishki ister organdaryna habardar etýge mindetti.
"Qurmetti qazaqstandyqtar! Qonaq úı, hostel, pansıonat jáne jataqhana ıeleri! Páterler men basqa da turǵyn úı ıeleri! Qazaqstan Respýblıkasynyń İshki ister mınıstirligi kóshi-qon zańnamasynyń talaptaryn qatań saqtaýǵa shaqyrady. Sheteldik azamat kelgen kúnnen bastap 3 jumys kúnniń ishinde ishki ister organdaryna mindetti túrde habar berilýi tıis. Osy merzimdi ótkizip alǵan jáne kóship kelýshiniń kelýi týraly ishki ister organdaryna habarlamaǵan jaǵdaıda jeke jáne zańdy tulǵa Qazaqstan Respýblıkasy Ákimshilik quqyq buzýshylyq týraly kodeksiniń 518-baby boıynsha jaýapqa tartylatynyn eskertemiz", - deıdi kóshi-qon qyzmeti komıteti tóraǵasynyń mindetin atqarýshy Aslan Atalyqov.
Atalǵan bap boıynsha zańdy tulǵalar úshin 10-25 aılyq eseptik kórsetkishke (31 800 – 79 500 teńgege) deıin, al qaıtalanǵan jaǵdaıda 100 aılyq eseptik kórsetkishke (318 000 teńgege) deıin aıyppul salynady. Jeke tulǵalarǵa aldymen eskertý jasalady. Zań talabyn qaıta buzǵany úshin 30 aılyq eseptik kórsetkish nemese 91 890 teńge kóleminde aıyppul qarastyrylǵan.
