Týǵan elim

Anyq basyp júrsem de jurt aldynda,

Namysyńdy týǵan el,

jyrta aldym ba?

Amanaty halqymnyń-babalarym,

Bar senim men úmitim-urpaǵymda !

Týǵan elim,

Kórsettiń qurmetińdi,

Óteı alar ma ekenmin mindetimdi?

Kóńilimde kók baıraq jelbireýde,

Qyran bolyp súısem be kún-betińdi?!

Jappar ıem!

Rızamyn,

bas uryldy,

Alshysynan túsirdiń asyǵymdy.

Týǵan elim, anamdaı aıalaımyn,

Men súıemin táýelsiz ǵasyrymdy!

Iá,súıem,

súıemin,

taǵy súıem,

Júrmin ázir ómirdiń aǵysymen.

Qyzǵaldaqtaı qulpyrar qyzdarym bar,

Ulym erteń súıiner «barysymen».

Týǵan elim,

máńgilik berik shynar,

Týǵan halqym ózińe serik,syńar.

Topyraǵyń bolsam el,armanym joq,

Ózeginen tirshilik ónip shyǵar...                                   

                 Qaǵbanyń tıtteı qustary

Qarsy alǵan demeı bótensiń,

Boldyńdar jannyń qushtary.

Kóńildiń qusy ma ekensiń,

Qaǵbanyń tıtteı qustary.

Ár sátin sanap,qushatyn,

Toqtatsam,shirkin ýaqytty.

Mekkede erkin ushatyn,

Qustar eń netken baqytty?!

Kelgender jaqyn, alystan,

Sezedi Haqta kúsh baryn.

Perishtelermen jarysqan

Qanatty meniń qustarym.

Tarıhqa toly jazırań,

Júrekke jylý jınadym.

Maǵan da Qaǵba áz uıam,

Qanatym meniń-ımanym.

Bıikten,mine, kórdińder,

Mekkege el-jurt jetýde.

Qaı jaqtan sender keldińder

Qaǵbany taýap etýge.

Nápsini rýhym jeńgendeı,

Móltildep jasym tamady.

Adamdar daǵy senderdeı,

Uıasyn kelip tabady!

Qarsy alǵan demeı bótensiń,

Boldyńdar jannyń qushtary.

Kóńildiń qusy ma ekensiń,

Qaǵbanyń tıtteı qustary?!

                                   Hat

Sen janymda bolmasań da,

birgemiz,

Bir júrgende ajyramas irgemiz.

Saǵan alǵash sóz aıtqandaı tolqımyn,

hat arqyly sóıleskende kúnde biz.

Óshkenimdi jandyrǵandaı hattaryń,

Ár sózińdi kóńilimde jattadym.

Jylaǵannan artyq eken kúlgenim,

joǵaltqannan kóp bolypty tapqanym.

Sezimim bar tamshy bolyp tamatyn,

Seni kútip taýsylǵandaı taǵatym.

Saǵan ushyp jetsem be eken qus bolyp,

biraq,átteń...

joq qoı meniń qanatym.

Bul álemge sensiz qalaı sıam men,

Tirshilikte baqyttymyn uıammen.

Dál janyńda bolmasam da tap qazir,

biz birgemiz kóńil qusy— qıalmen.

Hattarymmen saǵynyshym jarysqan,

İshim —alań...

syrtym dúrdeı arystan.

Súıgen júrek soǵady eken saǵattaı,

jan-jaryńdy izdegende alystan!

              Men kóktemdi saǵyndym

Men kóktemdi saǵyndym,

kóktem meni,

Janym jylý ańsaıdy kópten beri.

Ár kúnderim taǵdyrdyń tartýyndaı,

árbir mezgil— ómirdiń ótkelderi.

Jol kútkendeı kóńilim júr eleńdep,

Shýaǵymen kóktemniń gúl egem kóp.

Kóktem maǵan keledi búrshik atyp,

kóktem maǵan kóshedi bir óleń bop.

Ótip jatyr aı jyljyp, kún jańaryp,

Saǵynyshym muńmenen júr jamalyp.

Árbir kúnnen kóktemdi izdep júrmin,

ár kóktemnen kútemin bir jańalyq.

Sándi ekenin ómirdiń san uqtyrǵan,

Men kóktemdi saǵyndym saýyq qurǵan.

Kútýdemin kóktemdi,

al kóktem she?

Úıden shyqpas arýdaı zaryqtyrǵan.

Qıalymmen basamyn aıǵa da adym,

Ǵumyrymnyń ár sátin aımaladym.

Kóktem maǵan óleń bop kóshken kezde,

Bálkim men de kóktemge aınalamyn!

Dosym keldi

Dosym keldi aýyldan,

bul – jańalyq,

meniń janym qalada júr qamalyp.

Jaımashýaq kún syndy kóktem keldi,

aınalasyn jap-jaryq nurǵa malyp!

Shirkin, dáýren!

Aýyldyń tektiligi,

Balalyqtyń jalt etip ketti kúni.

Dosym keldi bal kúnder belgisindeı,

ertip alyp janyna epti inini.

Dostyń sózi aq bultpen teńeskendeı,

Sýret bolyp aýylym elesterdeı...

Ol sóılese júrekke jyr qonaqtap,

Almatyda aýyldyń lebi eskendeı.

Dosym keldi kóńildi jadyratyp,

Ákelgendeı aýyldan janyma qut.

Alystaǵy aýyldan sálem ákep,

izdep keler dosyńnyń bary-baqyt.

Dosym keldi aıtyp syr,

jańalyǵyn,

Ol – bólshegi shyn dostyq ǵalamynyń.

Qımaı-qımaı dosyma qol bulǵaımyn,

Uzap bara jatqandaı balalyǵym...

                            Saǵynysh

Áke, seni ajal erte taýypty-aý,

Sezem, ol jaq bul dúnıeden jaryqtaý.

Sen ketkende men túgili, mújilip,

taýlar daǵy alasaryp qalypty-aý...

Kózimde — jas,

Júregimde  — saǵynysh,

Saǵynyshty, qustar, kókke alyp ush.

Áke,sensiz ótken ǵumyr, tirshilik

endi maǵan maǵynasyz sabylys.

Qaıran arman kókke qanat jaıǵan-dy,

Endi mine,

bir qazyqqa baılandy.

Sen ketkeli tóńkerilip dúnıe,

Kóktem — kúzge,

Jazym- qysqa aınaldy.

Ákem meniń!

Aıbyndy ediń,

asqar eń,

Baýyryna aldy seni basqa álem.

Uldaryńdy jelbiretip jalaýdaı,

qyzdaryńa qushaǵyńdy ashqan eń.

Janyń — kókte,

meken etti aspandy,

Seni izdegen kóńilderden jas tamdy.

Saǵynysh pen ókinishi astasqan,

áke,sensiz kúnder endi bastaldy!

Aýyldan qaıtqanda

Qandaı kerim boz dalany baqylaý,

Jan dúnıeń týǵan jerge jaqyn-aý...

Balalyǵym, balǵyn shaǵym, dáýrenim,

Jýsan, seniń ıisińde jatyr-aý!

Týǵan aýyl, qymbatsyń dep aıta alam,

Ańsap saǵan kelgenimde jaı tabam.

Altyn uıam sende qaldy, Kezeńsý,

Qarlyǵashtaı qaıtyp kelem qaıtadan.

Oılar meni tereńine batyrar,

Kóńil qusy kúnine myń qatynar.

Shıler daǵy Shyǵys jaqqa bas ıip,

Jel de meni aýylyma shaqyrar.

Aýyl tursa, týǵan jerden el aýmas,

Jyrymdy da sende jazǵam eń alǵash.

Saǵan degen saǵynyshty, aýylym,

Eshbir óleń dál kórsetip bere almas!

 Saıat Qamshyger,  «Serper»  syılyǵynyń  laýreaty