Partıanyń sońǵy Búrosynda Memleket basshysy  N.Á. Nazarbaev qazirgi ýaqytta jetekshi saıası kúsh retinde «Nur Otannyń» aldynda turǵan mańyzdy mindetterdi naqtylap aıtty. Partıaǵa qazaqstandyqtardy Bes ınstıtýsıonaldyq reformany jáne «100 naqty qadam» josparyn júzege asyrýǵa jumyldyrýdy, «Nurly jol» baǵdarlamasynyń oryndalýyna baqylaý ornatýdy tapsyrdy. Qoǵamda birlikti bekemdep, óńirlermen jumysty kúsheıtýge jekeleı toqtaldy. Bul týraly Qamshy portaly Túrkistanǵa silteme jasaı otyryp habarlaıdy.

Elbasy júktegen mindetterdi júzege asyrý maqsatynda partıa jumysyn jetildirýge belsene kirisken partıa Tóraǵasynyń Birinshi orynbasary Asqar Myrzahmetov jumys saparymen  ótken aptada Ońtústik Qazaqstan, Jambyl, Almaty, Shyǵys Qazaqstan, Atyraý, Mańǵystaý, Aqtóbe oblystarynda, Almaty men Semeı qalalarynda boldy. Aımaqtaǵy partıa qyzmetimen jan-jaqty tanysty. Partıanyń jergilikti qurylymdary tarapynan aıtylǵan kóptegen usynystarǵa qulaq túrip, túıindi máselelerdi sheshý jóninde ashyq pikir almasqan Asqar Myrzahmetov saıası uıymnyń barlyq qurylymy aldaǵy ýaqytta kúsh salýǵa tıisti maqsat-mindetterge egjeı-tegjeıli toqtaldy.

Aldaǵy ýaqytta bas partıanyń halyqtyń ıgiligi jolyndaǵy is-qımyldary kelesi baǵyttarda órbimek.

Birinshi. Memlekettik baǵdarlamalardyń oryndalýyna, memleket qarjysynyń tıimdi jumsalýyna partıalyq baqylaý men baǵalaýdyń turaqty júıesin qalyptastyrý. Sebebi partıanyń Saılaýaldy tuǵyrnamasy osy baǵdarlamalarmen tikeleı baılanysty.

Ekinshi. Qoǵamdyq qabyldaýlardaǵy aryz-shaǵymdardy ekinshi jaǵynan da taldaý. Iaǵnı, qaıtalanyp otyrǵan nemese sozylyp, sheshilmeı kele jatqan shaǵymnyń sebebin, qandaı organ jumysyna baılanysty túskenin, qaı jerde, qandaı laýazym ıesi sheshpegenin anyqtap, shara qoldaný.

Úshinshi. Bastaýysh partıa uıymdarynyń jumysyn jandandyryp, júıeleý, Ortalyq apparat pen óńirler arasynda tyǵyz baılanys ornatý. Ol úshin barlyq aımaqtyq fılıaldarǵa naqty ındıkatorlar belgilenip, kún tártibindegi mindetter mejelenip, jumys nátıjesi baǵalanatyn bolady. Sonymen qatar, jergilikti jerdegi partıanyń qurylymdarynda qoıylyp otyrǵan mindetterdi óz dárejesinde oryndaý úshin tıisti jaǵdaı jasalady. Sol arqyly partıanyń negizgi kúshi sanalatyn 6 myńǵa jýyq bastaýysh partıa uıymdarynyń jumysyn úılestirý qajet. Aıtalyq, jınalatyn partıalyq jarǵynyń belgili bir mólsherin óńirlerdiń ózderine qaldyrý. Materıaldyq qoldaýmen birge moraldyq yntalandyrý da qolǵa alynbaq. Jergilikti jerdegi partıa belsendilerin depýtattyqqa, partıalyq jáne memlekettik qyzmetke keńinen tartý qajet.

Tórtinshi. «Jas Otannyń» jumysyn praktıkalyq turǵydan júrgizýge, ıaǵnı, naqty iske kóshý. Bul úshin jastar saıasaty salasyndaǵy barlyq baǵdarlamalarǵa taldaý júrgizilip, olardyń tıimdiligi baǵalanyp, Jastar qanaty olardy júzege asyrýǵa belsene atsalysýǵa tıis. Sonymen birge baǵdarlamalardan bólek, jalpy jastar tárbıesi, rýhanı qundylyqtar, salt-dástúr sabaqtastyǵyna erekshe nazar aýdarylyp, naqty jumystar atqarylýy kerek.

Besinshi. Partıanyń Parlamenttegi múmkindigin barynsha keńinen paıdalaný. Iaǵnı, partıa fraksıalary arqyly halyqtyń, óndiristegi, aýyl sharýashylyǵyndaǵy, basqa da salalardaǵy  kókeıkesti máselelerdi sheshetin zańnamalyq qujattardyń der kezinde qabyldanýyna yqpal etý. Parlamenttik fraksıamen jergilikti máslıhattardaǵy nurotandyq depýtattarmen júıeli, turaqty baılanys ornatý. Aýdandyq, oblystyq máslıhattardaǵy partıa qurylymdarynyń jumysynda da naqty ındıkatorlar belgilenip, baǵalaý júıesin engizý. Partıanyń atynan máslıhat depýtattyǵyna úmitkerlerdi anyqtaýdyń erejesin bekitý.

Altynshy. Sybaılas jemqorlyqqa qarsy ıdeologıa men jumysty barlyq deńgeıdegi, onyń ishinde jergilikti jerdegi partıalyq qurylymdar tartyla otyryp, kúsheıtý. Partıa janyndaǵy sybaılas jemqorlyqqa qarsy is-qımyl jónindegi qoǵamdyq keńester aýdandyq deńgeıde de uıymdastyrylyp, erejesin bekitý.

Sonymen qatar, «Nur Otan» partıasynyń óńirlerdegi anyqtalyp otyrǵan ózekti máselelerdiń aı saıyn Úkimette ótetin arnaıy kezdesýde qaralyp otyrýy boıynsha tıisti kelisimniń jasalǵany aıtyldy. Maqsat – týyndaǵan máselelerdiń ýaqyt kúttirmeı tezirek oń sheshilýine yqpal etý.

Buǵan qosa, partıa qyzmetiniń negizgi baǵyttary boıynsha oblystyq, qalalyq fılıal basshylarymen, ıaǵnı ákimdermen naqty jumys jospary túzilmek, aı saıyn fılıaldar jumysynyń nátıjesi anyqtalyp otyrmaq.

Taǵy bir másele, aldaǵy ýaqytta partıanyń biryńǵaı jańa medıa saıasaty túziledi.  Ol Elbasy saıasatymen memleket tarapynan halyqtyń ıgiligi jolynda atqarylyp jatqan ilkimdi is-sharalardy jurtshylyqqa keńinen nasıhattaý, partıanyń qoǵamnyń birligin bekemdeýdegi qyzmetin júıeli jolǵa qoıý baǵytynda órbimek. BAQ-ta, onyń ishinde partıanyń «Nur Medıa» holdıńine qarasty basylymdar men telearnada óńirlerdegi naqty jumystardy kórsetetin  arnaıy aıdarlar ashylmaq.

Ortalyq apparattyń shyǵyndary yqshamdalyp, qajettiligi shamaly esepterdiń, is-qaǵazdardyń sany qysqartylyp, óńirlerge bekitilgen ınspektorlardyń mindetti túrde aı saıyn oblystarǵa shyǵyp turýy jóninde de sheshimderdiń qabyldanyp jatqandyǵy  jetkizildi.

Partıa Tóraǵasy Birinshi orynbasary Ońtústik Qazaqstanǵa saparynda oblys basshysy Beıbit Atamqulovty Ońtústik Qazaqstan oblystyq fılıalynyń tóraǵalyǵyna saılaý konferensıasyna qatysty, aldaǵy mindetterdiń oryndalýyna tilektestigin bildirdi.

Almaty qalalyq fılıaldyń kezekten tys konferensıasynda Asqar Myrzahmetov fılıaldyń burynǵy tóraǵasy Ahmetjan Esimovtiń partıaǵa halyqtyń senimin arttyrý jolyndaǵy eńbegine alǵys aıtyp, jıyn barysynda saılanǵan jańa tóraǵa – Almaty qalasynyń ákimi Baýyrjan Baıbektiń jumysyna tabys tiledi.

Jumys sapary barysynda barlyq óńirde Saıası Keńes músheleri, partıa fraksıasynyń músheleri, bastaýysh partıa ókilderi, partıa belsendileri, «Jas Otan» ókilderi qatysqan jergilikti partıa aktıvinde óńirlik qurylymdar jumysyndaǵy qordalanǵan máseleler keńinen talqylandy. Osyǵan oraı fılıal basshylary, bastaýysh partıa ókilderi, óńir turǵyndary óz usynystaryn aıtty.

Máselen, Ońtústik Qazaqstanda partıalastar tarapynan aýdandyq, qalalyq fılıaldarda kadr máselesi boıynsha birqatar ózgerister engizý máselesi kóterildi. Búginde jergilikti óńirdegi fılıaldarda quramynda músheler sany 5 myń bolsa da, 50 myń bolsa da shtatta tek 3 qyzmetkerden bar. Ortalyq apparat tarapynan jyl basynda partıa músheleriniń sanyna qaraı shtattyq kesteni kóbeıtý týraly buıryq shyǵarylǵanymen, ol búgingi kúnge deıin júzege aspaı otyr. Osyǵan baılanysty shtattyq kesteni bekitý barysynda aýdan, oblys halqynyń sany eskerilse dedi, partıa belsendileri.

Al Jambyl oblysynda bolǵan jıynda bastaýysh partıa uıymdary tóraǵalarynyń jumysyn yntalandyrý máselesi kóterildi. Bastaýysh partıa uıymdary tóraǵalarynyń negizgi qyzmeti bar bolǵandyqtan, partıa uıymynyń is-qaǵazdaryn júrgizýge kóbine ýaqyty da bola bermeıdi. Sondyqtan, partıalyq jumystyń basty baǵyttaryn qamtıtyn «Bastaýysh partıa uıymynyń elektrondyq kitapshasy» ázirlense degen ótinish aıtyldy. Sonymen qatar, bastaýysh uıymdardy jeke jumys ornymen, ıaǵnı materıaldyq tehnıkalyq bazamen qamtamasyz etý de asa ózekti ekeni belgili boldy.

Almaty oblysynda partıalastar tarapynan kóterilgen máseleniń biri – jastar máselesi boldy. «Jas Otan» jastar qanaty bólimsheleriniń tóraǵalary qoǵamdyq negizde qyzmet atqarýda. Osy rette  bul jumysty  odan ári jandandyrý maqsatynda aýdandyq, qalalyq bólimshelerge bir shtattyq birlikten bólinse degen usynys tastaldy. Sonymen qatar, jastardy jumyspen qamtý, kásipkerlikke baýlý boıynsha da sheshimin tappaı turǵan jaıttar aıtyldy.

Shyǵys óńirde ásirese shaǵyn jáne orta bıznes ókilderi kásipkerlikti retteıtin zańnamalyq qujattarǵa tezdetip ózgertýler engizý boıynsha partıa tarapynan kómek kútetinin jetkizdi.

Búgingi kúni ásirese shyǵys óńirdiń kásipkerlerin oılantyp otyrǵany – kórshi eldermen alys-beriske qatysty kedergiler.

«Qazaqstan shaǵyn bıznes ókilderi men Reseı kásipkerleri úshin talap birdeı emes. Mysaly, Reseıde aýylsharýashylyq ónimderi 5 jylda bir ret sertıfıkattalady, al Qazaqstanda jyl saıyn sertıfıkattalady. Árıne bunyń barlyǵy aqyly. Buǵan qosa shaǵyn bızneske salyqtyq júkteme tym kóp», – deıdi SHQO kásipkerler palatasynyń dırektory Igor Shaskıı.

Atyraý oblysynda «Senim» bastaýysh partıa uıymynyń tóraıymy Baqytgúl Hamenova elektrondyq qoǵamdyq qabyldaý bazasy reglamentine ózgerister nemese tolyqtyrýlar engizý qajet ekenine toqtaldy. «Baza talaptary boıynsha azamattar ótinishteriniń oryndalýy týraly málimet 1 aıdyń ishinde joldanýy qajet. Alaıda keı jaǵdaıda máseleleriniń ózektiligine qaraı olardy zań sheńberinde sheshýge keminde 2-3 aı jumsalady. Al bul kezde elektrondy baza málimetterdi qabyldamaıdy», – deıdi ol.

Sonymen qatar, Mańǵystaý, Aqtóbe oblystarynda jergilikti partıalastar tarapynan depýtattyq fraksıalar jumysyn jandandyrý, oblystyq fılıalda máslıhattardaǵy depýtattyq fraksıalardyń jumysyn úılestirý mehanızmderin engizý máseleleri kóterildi.

Saılaýaldy tuǵyrnamany iske asyrý boıynsha  jylyna bir ret Parlament depýtattarynyń qatysýymen oblystyq, qalalyq, aýdandyq máslıhattardaǵy «Nur Otan» fraksıalarynyń birlesken otyrysyn ótkizý, depýtattar qyzmetine reıtingtik baǵalaýdy engizý usynyldy.

Sondaı-aq, partıanyń bir-birin qaıtalaıtyn «Baqytty balalyq», «Baqytty otbasy» sıaqty jobalaryn biriktirý, birtutas, maqsaty aıqyn, eń bastysy – iske asyrý joldary anyq jobalardy qoldanysqa engizý jaıy da aıtyldy.

«Apta saıyn ótetin jıyn men basqosýdyń sany emes, sapasy mańyzdy. Qoǵamdyq qabyldaýǵa úmit artyp, kómek surap kelgen ár adamnyń aryzy qaraýsyz qalmaı, kedergi men qıyndyqtyń túp-tórkini anyqtalýy qajet. Bir sózben aıtqanda, kúndelikti, naqty jumys júıesine aýysýymyz – Elbasynyń da, búgingi kúnniń de talaby».

«Nur Otan» partıasy Tóraǵasynyń Birinshi orynbasary óńirlerge saparyn túıindegen jıynda osylaı dedi.

Asqar Myrzahmetov jergilikti partıalastar tarapynan aıtylǵan usynys-pikirlerge baılanysty partıa naqty sheshimder qabyldaıtynyn atap ótti. Qyrkúıek aıynyń aıaǵyna deıin bul sheshimder qabyldanyp, óńirlerdiń shtatyna, qarjylandyrýǵa, uıymdastyrý, materıaldyq tehnıkalyq bazasy jáne taǵy basqa da máselelerge baılanysty ózgerister engizilmek.

"Qamshy" portaly