Búgin Almaty qalasy Respýblıka saraıynda «Meıirimdi Muhammed» rýhanı máýlit keshi ótti.  Rýhanı keshtiń uıymdastyrýshysy – QMDB Almaty qalalyq Ortalyq meshiti.

Keshke QMDB Tóraǵasy, Bas múftı Naýryzbaı qajy Taǵanuly qatysyp, jınalǵan halyqty quttyqtap arnaıy baıandama jasady.

Almaty qalasy ákiminiń quttyqtaý hatyn qalalyq din isteri basqarmasynyń basshysy Nurlan Qıqymov oqyp berdi. Máýlit keshine demeýshilik jasaǵan kásipker Bahreddın Nuǵmanuly jáne zıaly qaýym ókilderi, aqsaqaldar, meshit jamaǵaty men ımamdar qatysty.

Aqyn, sazger Jáken Omarov jyldaǵy dástúrmen paıǵambarymyzdyń ómirbaıanyn qazaq tilinde jyrlap, bıyl hıjrettiń 4-5 jyldar oqıǵasyn baıandady. Buǵan deıingi máýlit merekelerinde Paıǵambarymyzdyń balalyq shaǵy, odan keıin paıǵambarlyqtyń kelýi, mıǵrajǵa kóterilýi, odan keıin hıjrettiń alǵashqy jyldary men Bádir soǵysy, Ýhýd soǵysy, hazreti Hamzanyń sheıit bolýyna toqtalǵan bolatyn.

Máýlitke arnalǵan merekelik sharada «Óner qyrandary» teatry ujymy sahnalyq qoıylymdar qoıdy. Bul kórinisterde Allaǵa táýekel etý, teris qylyqtardan aýlaq bolý, durys dos tańdaı bilý, bala tárbıesindegi ata-ananyń roli t.b. mándi dúnıeler baıandaldy.

«Has-Saq» etno-folklorlyq ansabli, Qanatbek Polatbek jáne Rınat Tóre syndy estrada ánshileri ıláhı ánder oryndap, paıǵambarǵa degen saǵynyshtaryn ánmen jetkizdi. Sonymen qatar Paıǵambar súnnetin ómirine temirqazyq etip ósip kele jatqan jas jetkinshekter paıǵambarymyz jaıly poezıa oqydy. Paıǵambar ómirinen mol maǵlumat beretin kórme uıymdastyrylyp, kórermen nazaryna usynyldy.

Bıylǵy rýhanı Máýlit keshiniń ereksheligi kórermen suraýy boıynsha bir kúnde eki ret qoıylym kórsetildi. Tańǵy jáne túski qoıylym barysynda Respýblıka saraıy kórermenge lyq toldy.

Kesh sońynda Bas múftı rýhanı is-sharanyń ótýine demeýshilik jasaǵan belgili mesenat Baharıdın Nuǵmanulyn «Qazaqstan musylmandary dinı basqarmasyna 30 jyl» merekelik medalmen marapattady.

Sondaı-aq merekelik baǵdarlamaǵa úles qosqan belgili jyrshy Jáken Omarovqa, «Óner qyrandary» men «HasSak» ujymyna alǵys hatyn tabystap, rızashylyq nıetin jetkizdi. Sonymen qatar bıletten túsken qarajattan «Máýlit syıy» retinde «Nur-Múbarak» Egıpet ıslam ýnıversıtetiniń jańa ǵımaratynyń qurylysyna 4 000 000 teńgeniń sertıfıkaty berildi. Jáne de kómekke muqtaj azamattarǵa qarjylaı sertıfıkattar tabystaldy. «El úlesi - páterge» jobasy boıynsha Respýblıka boıynsha 596-baspana, Almaty qalasy boıynsha 20-baspana kiltin Túrksib aýdandyq «Mekke» meshitiniń ımamy, 7 balanyń ákesi Rahmatýlla Mollaqaǵanatulyna tabystady. Budan bólek Almaty Ortalyq meshitiniń janynan ashylǵan onlaın Quran kýrsynyń belsendi ustazyna tosyn syı retinde umra qajylyǵynyń sertıfıkaty berildi. Kórermenderge máýlit keshine arnaıy jazylǵan «Paıǵambarymyzdyta nısyz ba?» kitaby men múftıattyń tól basylymy «Munara» gazeti jáne «Iman» jýrnaly tegin taratyldy.

Sharanyń basty maqsaty – paıǵambarymyzǵa salaýat aıtý, onyń asyl qasıetterin dáripteý, halyq arasynda ımandylyqty nasıhattaı otyryp, turaqtylyq pen tynyshtyqqa úndeý bolyp tabyldy.

Almaty Ortalyq meshitiniń baspasóz qyzmeti