Májiliste sıfrlyq aktıvter salasyndaǵy zańnamany jetildirý maqsatymen «Qazaqstan Respýblıkasyndaǵy sıfrlyq aktıvter týraly» zań jobasy birinshi oqylymda maquldandy. Jobaǵa Májilis depýtattary bastamashy boldy.

Ózgertýler 4 ilespe zańǵa tikeleı áser etedi. Olar: «Astana» halyqaralyq qarjy ortalyǵy týraly, sıfrlyq aktıvter týraly zań jobalary, Salyq kodeksi jáne Ákimshilik quqyq buzýshylyq týraly kodeksi.

«Atalǵan zań jobalary sıfrlyq aktıvter naryǵyn memlekettik retteý jáne damytý, sıfrlyq aktıvterdi shyǵarý, ornalastyrý jáne aınalym  prosesinde týyndaıtyn qatynastardy retteýge baǵyttalǵan. Sondaı-aq sıfrlyq maınıng úshin ınfraqurylym usyný qyzmetin lısenzıalaýdy engizý, sıfrlyq aktıvter salasyndaǵy zań buzýshylyqtarǵa ákimshilik jaýapkershilikterdi belgileý, sıfrlyq maınıng úshin ınfraqurylym usyný qyzmetine salyq salýdy engizýdi qarastyrady», – dedi májilis depýtaty Ǵazız Qulahmetov.

Zań jobasy qabyldansa, maınıng fermalardy qamtamasyz etetin servıstik qyzmet túrleri júrgizilip, qadaǵalanady. Infraqurylym rettelip, qarjy ortalyǵy qyzmeti jetildiriledi. Sonyń aıasynda negizgi krıpto naryǵy qalyptasady. Sonymen qatar retteýshi memlekettik organdardyń róli de osy zań jobasynda aıqyndalady.

Negizgi másele – naryqta «sur maınerlerdiń» paıda bolýy, elektr qýatynyń tapshylyǵy. Ǵ.Qulahmetovtiń aıtýynsha, «sur maınerler» shetelden ákeletin qural-jabdyqtardyń rásimdelmeýinen kóp jaǵdaıda elge kelip jatqan tehnıkalarǵa da salyq salynbaı otyr.

Joba aıasynda búginge deıin depýtattardan alpysqa jýyq usynys berilgen. Olar jumys tobynyń, múddeli memlekettik organdardyń, «Astana» Halyqaralyq qarjy ortalyǵynyń,  «Atameken» Ulttyq kásipkerler palatasy, qoǵamdyq birlestikter men saraptamalyq uıymdar ókilderiniń qatysýymen bolǵan komıtettiń keńeıtilgen otyrystarynda talqylandy.

Májilistiń baspasóz qyzmeti