20 qazan kúni Almaty qalasy respýblıkalyq Dostyq úıinde ulttyq mereke – Respýblıka kúnine arnalǵan «Kók baıraqty qut mekenim» atty merekelik is-shara ótti.

İs-sharaǵa Qazaqstan Respýblıkasynyń eńbek sińirgen qaıratkeri, Abaı atyndaǵy Qazaq memlekettik akademıalyq opera jáne balet teatrynyń oryndaýshysy Talǵat Kúzembaev, Qazaqstan halqy Assambleıasynyń músheleri, etnomádenı birlestikterdiń shyǵarmashylyq ujymdary men jastar qatysty.

Kesh barysynda qonaqtar aldaǵy Respýblıka kúni merekesimen quttyqtap, ózderiniń izgi tilekterin bildirdi. Sonymen qatar konserttik baǵdarlama uıymdastyrylyp, Qazaqstan Respýblıkasynyń memlekettik syılyǵynyń ıegeri, eńbek sińirgen qaıratkeri Talǵat Kúzembaev, Halyqaralyq konkýrstardyń laýreaty Rada Flamenko, T. Júrgenov atyndaǵy óner akademıasynyń daryndy túlekteri, etnomádenı birlestikterdiń shyǵarmashylyq ujymdary óz ónerlerin kórsetti.

Aıta ketsek, 1990 jylǵy 25 qazanda Qazaq KSR Joǵarǵy Keńesiniń №307-XII qaýlysymen Qazaq KSR Memlekettik Egemendigi týraly Deklarasıa qabyldandy. Deklarasıa Qazaq KSR egemendigin jarıalap, Qazaqstannyń táýelsiz memleket retindegi saıası-quqyqtyq negizderin aıqyndady. Bul merekeniń tarıhı mańyzǵa ıe ekendigin eskere otyryp aǵymdaǵy jyldyń

29 qyrkúıeginde Memleket basshysy Q. Toqaev «Qazaqstan Respýblıkasynyń kınematografıa, mádenıet jáne mereke máseleleri boıynsha keıbir zańnamalyq aktilerine ózgerister men tolyqtyrýlar engizý týraly» zańǵa qol qoıdy, osyǵan sáıkes Respýblıka kúnine ulttyq mereke mártebesi qaıtaryldy.