Jambyl oblysynda jalǵan qujattardy daıyndaýmen aınalysyp kelgen adamdar toby ustaldy. Bul týraly jergilikti polısıa departamenti habarlady.

"Kólik quralyn tirkeýdiń jalǵan kýálikterin (tehnıkalyq pasporttardy) daıyndaǵany úshin Shý aýdanynyń Mamandandyrylǵan halyqqa qyzmet kórsetý ortalyǵynyń qyzmetkeri jáne onyń sybaılasy – osy mekemeniń burynǵy qyzmetkeri ustaldy. Áıel deldal retinde áreket etken. 150 myń teńge kólemindegi zańsyz aqshalaı syıaqy úshin sybaılasymen birge qujattardy burmalaý jolymen jalǵan tehnıkalyq pasporttardy daıyndaýmen jáne ótkizýmen aınalysqan" delingen habarlamada.

Tintý barysynda kúdiktiniń atyna tirkelgen 8 plasıkalyq kartochka, 41 daıyn jalǵan tehnıkalyq pasport, jalǵan qujattardy daıyndaý úshin jasalǵan 500 dana plasıkalyq kartochka tabylyp, tárkilengen. 

Atalǵan oqıǵa boıynsha qylmystyq kodekstiń 385-baby 2-bóligi boıynsha sotqa deıingi tergeý amaldary bastaldy.