Syrtqy ister mınıstriniń orynbasary Roman Vasılenko "Kárim Másimov Vengrıa azamattyǵyn alǵan" degen aqparatty joqqa shyǵardy. 

"Vengrıa tarapynyń bizge bergen málimetinshe, Másimov myrzanyń mundaı azamattyǵy bolmaǵan. Qosymsha aqparat túsken joq. Bizdiń elde qos azamattyqqa tyıym salynǵan jáne basqa eldiń azamattyǵyn alǵan adam avtomatty túrde bizdiń azamattyqtan aıyrylady" dep jaýap berdi Roman Vasılenko májilis kýlýarynda.

Buǵan deıin UQK-nyń burynǵy tóraǵasy Kárim Másimovte Vengrıa memleketiniń azamattyǵy bary týraly aqparat taraǵan. 18 qarashada Másimovtyń soty bastaldy. Oǵan birneshe aıyp taǵylǵan, solardyń ishindegi eń aýyry memleketke opasyzdyq jasady degen aıyp. Sot prosesi Astana qalasynyń qylmystyq ister jónindegi mamandandyrylǵan aýdanaralyq sotynda ótip jatyr. İs "qupıa" sanatyna jatatyndyqtan, málimetter jarıalanbaı otyr.