Búgin Almaty qalasynda ál-Farabı atyndaǵy Qazaq ulttyq ýnıversıtetinde Qazaqstan musylmandary dinı basqarmasynyń uıymdastyrýymen «Bereke bastaýy – birlikte» taqyrybynda respýblıkalyq ǵylymı-tanymdyq konferensıa ótti. Bas múftı Naýryzbaı qajy Taǵanuly arnaıy baıandama jasady.

Aıtýly jıyn qasıetti Quran aıatymen ashylyp, Bas múftı Naýryzbaı qajy Taǵanuly babalar rýhyna aıat saýabyn baǵyshtady. Osydan keıin qoǵamda birlikti nyǵaıtýdyń mańyzy men osy baǵyt boıynsha múftıattyń atqarǵan jumystary jaıly ázirlengen beıne rolık halyq nazaryna usynyldy.

Konferensıa jumysyna QMDB Tóraǵasy Naýryzbaı qajy Taǵanuly, ál-Farabı atyndaǵy Qazaq ulttyq ýnıversıtetiniń rektory Janseıit Túımebaev, jazýshy Smaǵul Elýbaı t.b. zıaly qaýym ókilderi, ǵalymdar, Almaty qalasynyń bas ımamy Tólebı Dádiluly bastaǵan din qyzmetkerleri, shákirtter men stýdentter qatysty.

«Quranda: «(Alla paıǵambarlaryn jiberýarqyly) jer betin túzep, jónge keltirgennen keıin, onda búlik shyǵaryp, buzyqtyq jasamańdar. Odan qorqyp ári meıiriminen úmit ete otyryp duǵa etińder. Shúbásiz, Allanyń raqymy izgi jandarǵa óte jaqyn» («Aǵraf» súresi, 56-aıat) deıdi.

Rasynda halyqtar arasyndaǵy tatýlyq adamdar arasyndaǵy tatýlyqtan, baýyrlastyqtan bastalady. Baýyrlastyq jalpy adamzattyq týysqandyqqa jol ashady. Aǵashtyń dińi myqty bolmasa, butaǵy da álsiz bolmaı ma? Olaı bolsa aldymen kózi ashyq azamattar ózara tatý bolýy kerek. Sonda ǵana adamzat tatýlyqtyń týyn bıik ustaıdy. Sebebi parasatty adamdar aýrýdyń emin ózgelerden artyq biledi» dedi Naýryzbaı qajy Taǵanuly.

Konferensıada «Islam – yntymaq kepili», «Birlik– bereke bastaýy», «Qutty biliktegi tutastyq ıdeıalogıasy» taqyryptarynda zıaly qaýym ókilderi baıandama jasady. Aıta ketsek, ıgi basqosý Bas múftı Naýryzbaı qajy Taǵanulynyń dinı qyzmet aıasynda 2022 jyldy «Islam – yntymaqpen birlik dini» jyly dep jarıalaǵan bastamasyna oraı uıymdastyryldy.