Qazaqstanda taǵy bir saıası partıa paıda bolýy múmkin. Ádilet mınıstrligi "Halyq derbestigi" jańa partıasyn tirkeý – qujattardy saraptaý satysynda ekenin habarlady, dep jazdy KazTAG agenttigi.
"Bıyl "Halyq derbestigi" saıası partıasynan memlekettik tirkeýden ótý týraly ótinish tústi, qazirgi ýaqytta quryltaı qujattaryna saraptama júrgizilýde" delingen habarlamada.
Saıası uıym jetekshisi eks-depýtat, 2019, 2022 jylǵy prezıdent saılaýlarynda kandıdat retinde tirkelmek bolyp, tirkele almaǵan – Jumataı Álıev.
Mınıstrlik málimetinshe, jyl basynan beri 10 bastamashyl toptan partıa qurý týraly habarlama kelip túsken. Olardyń tórteýine tirkeý boıynsha kelesi kezeń prosedýralaryn júzege asyrýǵa ruhsat berilgen.
Kelesi kezeńge jiberilgen bastamashyl toptyń ishinde "Baıtaq" jýyrda ǵana resmı túrde partıa retinde tirkeldi. Ózderin ekologıalyq máselelerdi kóteretin jasyldar partıasy retinde tanytyp júrgen saıası uıym jetekshisi Azamathan Ámirtaı tirkelgennen keıingi baspasóz máslıhatynda "prezıdentke Ádiletti Qazaqstandy birge qurýǵa kómektesemiz" dedi. Táýelsiz sarapshylar "Baıtaq" elde saıası reforma júzege asyp jatqanyn kórsetý úshin qurylǵan bılikshil partıa, shyn máninde bul – saıası reforma ımıtasıasy ǵana ekenin aıtady.
Al bılikti, úkimettiń jekelegen múshelerin jıi synaıtyn saıasatanýshy Sanjar Boqaevtyń "Namys" partıasy quryltaı ótkizip, bastamashyl toptyń 700 múshesin jınaı almady. Saıasattanýshy "Qazaqstanda partıa qurý úshin ákimshilik kedergiler kóp, 700 múshe demokratıalyq elder turmaq, kórshiles elderde joq talap" deıdi.
Opozısıalyq saıasatker Jasaral Qýanyshalın bastaǵan top ózderiniń "Alǵa, Qazaqstan" partıasy bastamashyl tobyn tirkeı almaı júr. Saıasatker buny bılik ádeıi jasap otyr dese, Ádilet mınıstrligi belsendilerdiń qujatynda shıkilik bolǵan soń kerip qaıtardyq deıdi.
Partıa qurý týraly habarlama ótkizgen ózge bastamashyl toptar týraly aqparat az.
Budan bólek bıyl saıasatker Muhtar Taıjan "Jer qorǵany", kásipker Bolat Ábilov "Bizdiń tańdaý", marqum saıasatker Baltash Tursymbaı "el men jer" partıasyn quratynyn týraly málimdegen.
Qazirgi ýaqytta partıany tirkeý úshin bastamashyl top músheleriniń sany kemi 700, partıa múshesi 5 myń, aımaqtyq bólimshelerdegi múshe sany kemi 200 bolýǵa tıis.
