Májilis Tóraǵasy Erlan Qoshanov bastaǵan Qazaqstannyń parlamenttik delegasıasy Ujymdyq qaýipsizdik sharty uıymy Parlamenttik Assambleıasynyń kezekti otyrysyna qatysý úshin Máskeýge jumys saparymen bardy.

Keńestiń birlesken otyrysyna jáne UQSHU PA XV plenarlyq otyrysyna qatysýshylar Armenıa Respýblıkasynyń 2021-2022 jyldardaǵy Uıymǵa tóraǵalyǵynyń qorytyndylary men Belarýs Respýblıkasynyń aldaǵy tóraǵalyǵy kezindegi basymdyqtary týraly aqparatty tyńdady.

Májilis spıkeri óz sózinde óńirde turaqtylyq pen qaýipsizdikke nuqsan keltiretin túrli qaýip-qaterler men qaqtyǵystardyń ózekti bolyp otyrǵanyna nazar aýdardy. Mundaı jaǵdaılarda ashyq dıalogtyń mańyzdylyǵyn Qazaqstan Prezıdenti talaı márte atap ótken bolatyn. E.Qoshanovtyń aıtýynsha, osy tusta UQSHU elderi parlamentterine úlken jaýapkershilik júktelip otyr.

Otyrys barysynda Májilis Tóraǵasy Uıymǵa múshe elderdiń terorızmmen kúres salasyndaǵy ulttyq zańnamalaryn úılestirýge múmkindik beretin Ujymdyq qaýipsizdik sharty uıymynyń «Terorızmge qarsy is-qımyl týraly» jańa modeldik zańyn ázirleýdi usyndy.

– Terorızm qaýipsizdik pen turaqtylyqqa úlken qaýip tóndiredi. Ol zańsyz kóshi-qonnyń, transshekaralyq qylmystyń, zańsyz qarý-jaraq pen esirtki tasymalynyń artýyna yqpal etedi. Bizge osy syn-qaterlerge birlesip qarsy turýdyń naqty quqyqtyq tetikterin qalyptastyratyn UQSHU elderiniń modeldik zańnamasynyń sapaly bazasyn qamtamasyz etý kerek, – dedi E.Qoshanov.

Otyrysta Uıymǵa múshe memleketterdiń ulttyq zańnamasyn jaqyndastyrý jáne úılestirý boıynsha UQSHU PA-nyń qoldanystaǵy is-sharalar baǵdarlamasyn iske asyrý aıasynda birqatar modeldik quqyqtyq akti qabyldandy.

Sonyń ishinde otyn-energetıkalyq keshen obektilerinde terorızmge qarsy is-qımyl, halyqaralyq terorızmniń UQSHU elderine enýi múmkin arnalarǵa tosqaýyl qoıý, UQSHU modeldik aktilerin qabyldaý úshin ázirleýdiń jáne daıyndaýdyń ádistemelik negizderin jetildirý boıynsha usynymdar bar.

Sonymen qatar otyrystyń kún tártibindegi máselelerdiń biri  bıylǵy 20 qarashada ótken Qazaqstandaǵy prezıdenttik saılaýdy baqylaýǵa qatysqan UQSHU Parlamenttik Assambleıasy monıtorıńtik tobynyń qorytyndylary týraly boldy. UQSHU PA mısıasynyń qorytyndysyna sáıkes, saılaý halyqaralyq normalar men ulttyq zańnamaǵa tolyǵymen sáıkes ótti.

Aıta ketý kerek, UQSHU PA quramyna Armenıa, Belarýs, Qazaqstan, Qyrǵyzstan, Reseı jáne Tájikstan parlamentteriniń ókilderi kiredi. Onda áleýmettik-ekonomıkalyq jáne quqyqtyq máseleler, saıası máseleler jáne halyqaralyq yntymaqtastyq, qorǵanys jáne qaýipsizdik máseleleri boıynsha úsh turaqty komısıa jumys isteıdi.

Májilistiń baspasóz qyzmeti