Májilis tóraǵasy Erlan Qoshanov májilis otyrysynan keıin jýrnalıserge Reseıdiń Qazaqstandaǵy elshisi Alekseı Borodavkınniń bergen suhbaty týraly pikir bildirdi.

"Elshiniń suhbatynyń keı tustary onyń mártebesine saı kelmeıdi ári paıda ákelmeıdi dep oılaımyn. Borodavkın myrza óte tájirıbeli dıplomat, ol úgit-nasıhatshylar men saıasattanýshylardyń jeteginde ketpeýi kerek", – dedi Qoshanov elshi málimdemesi jaıly suraqqa.

"Ekinshiden, ksenofobıa Reseıde de jáne basqa elderde de bar. Saıasatkerlerimizdiń málimdemeleri ekijaqty qarym-qatynasqa nuqsan keltirmeýi úshin biz memleketterimizdiń ıgiligi jolynda birge jumys isteýimiz kerek", – dedi májilis tóraǵasy.

Keshe Reseıdiń Qazaqstandaǵy elshisi Alekseı Borodavkın reseılik basylymdardyń birine bergen suhbatynda Qazaqstandaǵy radıkaldy ultshyldar men rýsofobıa týraly aıtyp, Reseıdiń olarmen kúreske "kómek berýge daıyn" ekenin málimdegen bolatyn.