Kásipker, "Choco" holdıńiniń negizin qalaýshy ári atqarýshy dırektory Ramıl Mýhorápovqa qatysty is toqtatyldy, dep habarlady Tengrinews.kz saıty.

Almaty Polısıa departamenti málimetinshe, Ramıl Mýhorápovtyń isi boıynsha áleýmettik, ulttyq, rýlyq, násildik, taptyq jáne dinı alaýyzdyqty qozdyrǵany týraly derekti tekserý úshin sotaldy tergeý júrgizilgen.

"Sotaldy tergeý nátıjeleri boıynsha qylmystyq qýdalaý organy qylmystyq quqyqbuzýshylyq quramy bolmaýyna baılanysty qylmystyq isti toqtatý týraly sheshim shyǵardy. Bul sheshim QR Qylmystyq is júrgizý kodeksiniń 2-tarmaǵy 35-baby 1-bóligi boıynsha qabyldandy. Almaty prokýratýrasy qabyldanǵan is júrgizý sheshimimen kelisti", - dedi Almaty prokýrorynyń orynbasary Nurlan Aýǵanbaev.

Buǵan deıin Ramıl Mýhorápov jıyndardyń birinde elge kelip jatqan reseılikterge qazaq tildi ortanyń olardy túsine tura, qazaq tilinde jaýap berýi "birtúrli ári ultshyldyqtyń belgisi" ekenin aıtqany qazaqstandyqtardyń narazylyǵyn týdyrǵan. Keı azamattar onyń ústinen shaǵymdanyp, jaýapqa tartýdy talap etken.