Qaraǵandy qalasynda eki qabatty turǵyn úıde gaz balony jaryldy, dep habarlady oblystyq tótenshe jaǵdaılar departamenti.
21 qańtar kúni keshki saǵat 18:51-de Shors kóshesindegi eki qabatty turǵyn úıde bes lıtrlik gaz balony jarylǵan. Sonyń saldarynan birneshe páterge zaqym kelgen. Aǵash tóbeler men arqalyqtar ishinara opyrylǵan.
"Resmı málimetke sáıkes, gaz janǵan joq. Biraq kýágerlerdiń sózine qaraǵanda, qutqarýshylar kelgenshe ottyń jalyny kórindi. Tótenshe jaǵdaı kezinde 1970 jyly týǵan er adam men 1971 jyly týǵan áıel adam zardap shekti. Ekeýi de kúıip qaldy. Qazirgi kezde Qaraǵandy qalasynyń oblystyq medısınalyq ortalyǵyna emdelip jatyr. Oqıǵa ornyna 8 tehnıka mingen 36 órt sóndirýshi bardy. Qutqarýshylar qulaý qaýpi bar qurylys bólshekterin demontajdaý boıynsha jumys júrgizdi. Túnde osy kireberis turǵyndaryn jataqhanaǵa ornalastyrýǵa sheshim qabyldandy. Oqıǵanyń mán-jaıy anyqtalyp jatyr" delingen departament habarlamasynda.
Pikir qaldyrý