Túrkistan oblysy polısıa departamenti 15 jastaǵy qyzdy alyp qashý oqıǵasyna qatysty sotqa deıingi tergeý jumystary bastalǵanyn habarlady. 

"Shymkent turǵynynyń kámeletke tolmaǵan qyzyn úılený maqsatynda alyp qashqany týraly aryzy boıynsha, Jetisaı aýdanynyń polısıasy QR Qylmystyq kodeksiniń 122-babymen (On alty jasqa tolmaǵan adammen jynystyq qatynas nemese seksýaldyq sıpattaǵy ózge de áreketter jasaý) sotqa deıingi tergep-tekserýdi bastady. Qazirgi kezde tıisti saraptama taǵaıyndaldy. Qajetti tergeý áreketteri júrgizilip jatyr. İs Túrkistan oblysy PD baqylaýyna alyndy", delingen vedomstva habarlamasynda. 

Buǵan deıin NeMolchı qorynyń jetekshisi Dına Tańsári Jetisaıda 15 jastaǵy qyzdy alyp qashqany týraly aqparat jarıalaǵan. Belgili bolǵandaı, qyzdyń anasy alyp qashqandardan qalyń mal retinde 600 myń teńge alyp, olarǵa keshirim bergen. Atalǵan jaǵdaıdy áleýmettik jeli arqyly estigen qyzdyń ákesi polısıaǵa aryzdanǵan. Ákesi qyzyn tanymaıtyn jigitke erkinen tys turmysqa bergenin aıtady.