Túrkıada zilzaladan qaza bolǵandar sany 12,3 myńnan asty, dep jazady Anadoly agenttigi.

Tótenshe jaǵdaılar men apattar jónindegi basqarma jer silkinisinen 12 391 adam qaza taýyp, 62 914 adam jaraqat alǵanyn habarlady. Dalada qalǵan halyqty ornalastyrý úshin shatyrlar tigilgen. 

AFAD deregine sáıkes, 6 aqpan kúni Túrkıanyń Kahramanmarash-Pazardjık aýdanynda qýaty 7,7 baldy, Elbıstanda 7,6 baldy quraǵan eki zilzala bolyp, dúmpý eldiń 10 provınsıasynda, kórshiles Sırıada sezilgen.

Keshe jer silkinisi taǵy qaıtalanǵan. Onyń magnıtýdasy 5,4 balǵa jetken.

Úıindilerdi arshý táýlik boıy júrip jatyr. Keshe Túrkıanyń Qazaqstandaǵy elshisi jer silkinisinen keıin 4 qazaqstandyqtyń joǵalyp ketkenin málimdegen. Onyń biri – Sabıra Mamadıarova úıindi astynan aman tabyldy. Ózgeleri áli izdestirilip jatyr.