2022 jyldyń qańtarymen salystyrǵanda sút 32,9%-ǵa qymbattaǵan. Bul – Ulttyq statısıka búrosy málimet jarıalaı bastaǵan 2011 jyldan bergi rekordtyq kórsetkish, dep jazady Energyprom.kz saıty.

Maılylyǵy 3,2%-4% pasterlengen sút bir jylda 31,2%-ǵa qymbattasa, kilegeı 30%, maılylyǵy 2,5% pasterlengen sút baǵasy 28,8% ósken.

Óńirler boıynsha 2023 jylǵy qańtarda maılylyǵy 2,5% pasterlengen sút baǵasynyń jyl saıynǵy ósýi 14,1%-dan 42,1%-ǵa deıin aýytqıdy.

Maılylyǵy 3,2%-4% pasterlengen sút Almatyda (43,5%), Soltústik Qazaqstan (43,3%) jáne Jetisý (36,2%) oblystarynda aıtarlyqtaı qymbattaǵan. Baǵa eń az ósken óńir – Aqtóbe oblysy: 5,9%.

2022 jyldyń 12 aıynda sektorda óndirilgen ónim kólemi 573,3 myń tonnany quraǵan. Bul 2021 jylmen salystyrǵanda 6,2% az.