Belgili jýrnalıs Darhan Ábdik memleket qazaq tiliniń máselesine osydan 30 jyl buryn kiriskeninde búginde til tóńireginde eshqandaı másele týyndamas edi dep sanaıdy.

"Qazaqstanda qazaq tilin memlekettik til dárejesine kóterýge kim qarsy? Ol kafedegi daıashylardy qýalap júrip keshirim suratý nemese dúkenge baryp urys shyǵarý emes. Memlekettik tilde birinshi kezekte memlekettik qyzmetkerler sóıleý kerek. Talapty depýtattarǵa, mınıstrlerge, prezıdentke qoıý kerek, solar sóılesin. Qalǵandary jaǵdaıdy kórgende úırenip shyǵady. Ázerbaıjanda, Ózbekstanda til máselesi sheshilmeı qalǵan joq. Jas býynnyń barlyǵy sol tilde sóılep júr. Bizdiń bılik til máselesin qoldan jasap otyr. Óıtkeni birde-bireýiniń balasy qazaqsha sóılemeıdi. 30 jylda 30 til úırenýge bolar edi. Másele tilde emes, bıliktiń pozısıasynda. Oǵan óziń sekildi qarapaıym, nesıesin zorǵa tólep, onsyz da teperish kórip júrgen adamdardy aıyptaýǵa bolmaıdy. Ózińmen teń adamǵa zábir kórsetý durys emes. Al bılikten talap etý kerek, sebebi bılik mindetti" dedi ol DOPE SOZ youtube jobasyna bergen suhbatynda.

Jýrnalıs memlekettik tildi nyǵaıtýdy erte bastaǵanda búgingi tańda bul másele sheshilip turar edi, til máselesin sheshpeı kele jatqan bılik degen pikirde.

"Eń bolmaǵanda qazaq tilinde sóıleýge mindetti laýazymdar tizimin engizýge bolar edi. Eger adam qazaq tilin bilmeı, jeke sektorda jumys istese tolyq keliser edim, ol onyń óz erki. Mysaly Amerıkada aǵylshynsha bilmeıtin ıspandyqtar, ıspansha sóıleıtin meksıkandar óte kóp. Biraq AQSH kongresmeniniń aǵylshynsha sóıleı almaǵanyn elestete alasyz ba? Parlamentke qazaqsha bilmeıtin adamdardy jibermesin. Bul saılaýǵa túsý úshin qoıylatyn shart bolsyn. Sheshkisi keletin adam bolsa, otyz jylda til máselesin sheshýge bolar edi..."- deıdi ol.