Qurylys salasyndaǵy otandyq óndirýshiler ımportty yǵystyryp jatyr. Alaıda ımportty almastyrý prosesimen baǵanyń kúrt ósýi qatar júrip keledi, dep jazady energyprom.kz portaly.

2022 jyly qurylys materıaldaryn shyǵaratyn qazaqstandyq kompanıalar óndiris ósimi boıynsha aldyńǵy jylǵy tabysty qaıtalaı almaǵan. Ónerkásiptegi óniminiń naqty kólem ındeksi ótken jyldyń jeltoqsan aıynda 101,3%-dy qurasa, 2021 jyldyń 12 aıynyń qorytyndysy boıynsha kórsetkish 109,8%-ǵa jetken. Alaıda saladaǵy mundaı joǵary óndiris kórsetkishteri sońǵy ret 2013 jyly ǵana tirkelgen.

Qazaqstanda qurylys materıaldaryn óndirý kólemi alǵash ret trıllıondyq mejeden asty. Dálirek aıtqanda, jalpy ónim kólemi 1,13 trln teńgeni qurady, bul – 2021 jylmen salystyrǵanda qundyq mánde 230,7 mlrd teńgege (nemese 25,6%) artyq. 

2022 jyly elde otqa tózimdi emes keramıkalyq kirpish (64,3%), sılıkat jáne qoj (shlak) kirpish (18%), sementten, betonnan nemese tastan jasalǵan plıtka (16,9%) óndirisi aıtarlyqtaı qysqarsa, qurylys eritindileri (25,1%), árleý tastary (7,8%), gıps (26,6%) jáne ártúrli otqa tózimdi qurylys buıymdary (38%) óndirisiniń kólemi ulǵaıa túsken.

2022 jyldyń qańtar-qarasha aılarynda "QazIndustry qazaqstandyq ındýstrıa jáne eksport ortalyǵy" AQ sarapshylary otandyq óndirýshilerdiń ishki naryqtaǵy úlesin 66% dep baǵalady. Bul 2021 jyldyń sáıkes kezeńimen salystyrǵanda 8 paıyzǵa artyq. Uıym mamandary ekinshi jyl boıy qazaqstandyq óndirýshilerdiń el ishindegi naryqtaǵy úlesiniń artqanyn atap ótti.

"Qurylys materıaldarynyń baǵasy 2021 jyldyń maýsymynda aıtarlyqtaı ósti. Sonda óńdeýshi kásiporyndardyń baǵa ındeksi 106,9%-dy qurady. Eń joǵary kórsetkishke 2022 jyldyń mamyr aıynda 112,3%-ǵa jetti. 2022 jyldyń ekinshi jartysynda dınamıka azdap tómendedi, biraq baǵanyń ósýi burynǵysynsha saqtaldy (107,3%–111%). Qurylys materıaldarynyń qymbattaýy basqa ınflásıalyq faktorlarmen qatar jańa ǵımarattardaǵy turǵyn úı baǵasyna da áser etti. 2022 jyly bir sharshy metr turǵyn úı qurylysyna ortasha naqty shyǵyn 129,1 myńnan 148,7 myń teńgege deıin ósti. Bul sońǵy bes jyldaǵy baǵanyń eń úlken serpini"