Eks prezıdent Nursultan Nazarbaev amerıkalyq saıasatkerlerge 20 jyl ishinde jalpy quny 45 mln teńge turatyn baǵaly zattar syılaǵan. Bul týraly PROTENGE Tellegram arnasy habarlady. 

"Nursultan Nazarbaev AQSH-tyń burynǵy elshisi Djon Ordveıge quny  9 995 dollar turatyn "Blancpain" saǵatyn syılaǵan.  Qymbat saǵatty Amerıka hattamasynyń bas keńsesi dıplomatıalyq poshta arqyly Astana qalasyndaǵy elshilikten alǵan. AQSH- prezıdenti men sheneýnikteri sheteldik saparlarynda alǵan syılyqtardy jarıalap, memlekettik muraǵatqa tapsyrady. Tipti, syılyqtyń quny 5 myń dollar bolsa da osy ereje saqtalady. Áıtpese, syılyq para bolyp esepteledi. Eger alǵan syılyǵy qatty unap jatsa satyp alýǵa múmkindik berilgen. Alaıda amerıkalyqtardyń kóbi syılyqty satyp almaıdy", delingen jazbada. 

Jazba avtory Qazaqstanda mundaı tájirıbe qoldanylmaıtynyn aıtqan. 

"Qazaqstandyq sheneýnikterdiń qandaı syılyq alǵanyn biz tek boljaı alamyz. 20 jyldyń ishinde biz amerıkalyqtarǵa 101 955 dollar nemese 45 mln teńgeden astam qarajatqa syılyq jasappyz. Eń qymbat syılyqty Qazaqstan atynan Nursultan Nazarbaev syılaǵan. Ol 2006 jyldyń mamyrynda AQSH-tyń vıse-prezıdenti Dık Cheınıge 25 myń 300 dollarǵa (11 mln teńgeden asady - Red.) baǵalanǵan  Breguet saǵatyn syıǵa tartqan. Joǵary laýazymdy sheneýnik energetıka máselelerin talqylap, Kaspıı teńiziniń túbimen Reseıdi aınalyp ótetin gaz qubyryn tartý jóninde aıtýy kerek edi. Biraq bárimizge belgili bolǵandaı is kelissózden ári aspady", dep jazady PROTENGE.