Búgin Qańtar oqıǵasynda qaza bolǵan 4 jasar Aıkórkemniń isine baılanysty baspasóz konferensıasy ótti. Konferensıada Aıkórkemniń ákesi Aıdos Meldehanuly, onyń advokaty Rafık Beısebekov jáne belgili jýrnalıs Bakytjan Kosbarmakov sóz sóıledi.

Advokattyń aıtýynsha, áskerı tergeý komıteti qylmystyq isti birjaqty qarap, sotqa ótkizbekshi.

"İs Qylmystyq Kodekstiń jasóspirim balany óltirý emes áskerı qyzmet babyn asyra paıdalaný baby boıynsha qozǵalǵan. Aıkórkemge 5 adam oq jaýdyrsa da, tergeý vzvod komandırin ǵana kináli dep tanyp otyr. Al basqalary tek kýáger retinde tergelgendikten, jazadan qutylyp ketpek", dedi Rafık Beısebekov. 

Aıkórkemge 5 sarbaz oq atqan. Alaıda sarbazdardyń biri jumystan shyǵyp ketken. Al qalǵany kúdikti retinde emes kýáger retinde tirkelipti. 

"Jumystan shyǵyp ketken sarbazdyń qaıda júrgeni belgisiz. Halyq tólegen salyqtyń arqasynda aılyq alyp otyrǵan áskerı prokýratýra qarapaıym halyqqa oq jaýdyrǵany azdaı, qylmystyq isti ádiletsiz júrgizip otyr. Olardyń áreketi – zańǵa qaıshy", deıdi Rafık Beısebekov.

Al Aıkórkemniń ákesi Aıdos Meldehannyń málimdeýinshe, ádildik talap etkeni úshin oǵan belgisiz bireýler qysym kórsetken.

"Meni balalarymmen qorqytyp otyr. Qalǵan balalaryńnan da aıyrylyp qalǵyń kele me dep qoqan-loqy jasady. Qazir balalarymnyń psıhologıasy buzylǵan. Bizdiń elde shyndyq, ádildik joq. Halyqaralyq tergeý júrgizilgenin qalaımyn. Osydan keıin Jańa Qazaqstan qurylmaǵanyna kózim jetti", deıdi Aıdos Medelhan.