2-shi naýryzda №24 aýdandyq saılaý komısıasynyń №55 hattamasymen QR Parlamenti Májilisiniń Soltústik Qazaqstan oblysy boıynsha depýtattyǵyna kandıdat Asylbek Qojahmetovti tirkeý týraly sheshim joıyldy. Asylbek Qojahmetov – Almaty menedjment ýnıversıtetiniń prezıdenti.

Onyń kandıdattyqtan alynyp tastalýyna salyq deklarasıasynda kórsetilgen qate málimetter sebep bolǵan. Naqtylaıtyn bolsaq, Asylbek Qojahmetov 2001 jyly tirkelgen "Bıznes kóshbasshysy" basqarý oıynynyń televızıalyq senarıine avtorlyqty quqyq týraly qujatta atap kórsetpegen. Alaıda saıasatker ony eshqashan paıdalanbaǵanyn aıtyp otyr.

Búgin Almatyda Asylbek Qojahmetov pen onyń senimdi ókili Dos Kóshimniń qatysýymen baspasóz konferensıasy ótti. Kandıdattyń senimdi ókili Dos Kóshim saılaýdan shettetýdiń zańsyz ekenin atap ótti.

"Konstıtýsıa boıynsha ár azamattyń saılaýǵa túsýge, saılanýǵa quqyǵy bar. Biraq osy quqyqtarǵa qarama-qaıshy keletin keıin shyqqan zańdar da bar. Biz Asylbek Qojahmetovtyń baǵdarlamasy men buryn opozısıanyń basshysy bolǵandyqtan saılaýdany alynyp tastalyp otyr demeımiz. Tek birneshe qarama-qaıshylyqtar baıqalatynyn aıtqymyz keledi. Ortalyq saılaý komısıasyndaǵy normatıvtik zańdar men aktilerdi alǵa tartyp, tirkelgen kandıdattardy alyp tastaý bastaldy. Bizdiń saılaý aldy naýqanymyz osy sebepten toqtap tur. Eger búginge deıin kandıdat tirkeýden ótken bolsa onyń saılaýǵa qatysýǵa tolyq quqy bar", dedi Dos Kóshim. 

Budan bólek saıasatker Shoqan Ýálıhanov aýdanyndaǵy mádenıet úıiniń basshysyn sotqa berip jatqanyn aıtty: 

"Sebebi aqshasyn tólep, sol mádenıet úıinde kezdesý ótkizýdi josparladyq. Alaıda olar bizben qatarlastyryp "Amanat" partıasynyń kezdesýin ótkizgen. Birdeı ýaqytta, birdeı orynda 2 kezdesýdi belgilep qoıǵan. Partıa múshelerine qujattarymyzdy kórsettik. Keıin olar faıede kezdesý ótkizetinin aıtty. Men eshqandaı qujatsyz kezdesý ótkizýge bolmaıtynyn aıtyp, eskerttim. Bul bizdiń kezdesýge kedergi jasaý úshin ádeıi jasalǵan. Osyndaı aıaqtan shalý oqıǵalary kezdesip jatyr. Meniń oıymsha, munyń barlyǵy burynǵy aýrý, burynǵy dert jáne burynǵy másele. Jańa adamdar bılikke kelse shama kelgenshe toqtatýǵa tyrysady. Bul jaǵdaı áli kúnge deıin bar. Amal joq, ózimizdiń aryz-ótinishimizdi berdik. Qandaı nátıje shyǵatynyn ázir bilmeımin".