Otbasy bankinde («Báıterek» holdıńiniń enshiles uıymy) ashylǵan qazaqstandyqtardyń 883 071 depozıti 10% kóleminde, jalpy somasy 115 mlrd teńgeden astam ótemaqy alady.

Teńgelik depozıtterdi qorǵaý baǵdarlamasynyń erejelerine sáıkes, ótemaqy 20 mln teńgeden aspaıtyn salym somasyna 10% kóleminde esepteletin bolady. Bul bir bankte ashylǵan barlyq depozıtterdiń jalpy somasy.

2023 jyldyń 23 aqpanyndaǵy jaǵdaı boıynsha, Otbasy bank salymshylarynyń 80% jýyǵy (689 597) 200 000 teńge kólemindegi ótemaqyǵa qol jetkizedi. Klıentterdiń taǵy 13,3% (113 686) 200 000 teńgeden 500 000 teńgege deıingi somaǵa senim arta alady. 1 mln teńgege deıingi memlekettik qoldaýdy salymshylardyń 3,99 % (34 127) ıemdenedi. Al 2 mln teńge kólemindegi eń joǵary soma 2 375 depozıt ıeleriniń esepshotyna túsedi.

Ótemaqy alýǵa ótinish bergenderdiń arasynda shotynda nebári 10 teńgege deıingi jınaǵy bar salymshylar da boldy. Olardyń barlyǵy (539) 1 teńge kóleminde ótemaqy alady.

Ótemaqy 2023 jyldyń 10 aqpanyna deıin ótinish berý arqyly tólemge kelisimin rastaǵan salymshylarǵa ǵana aýdarylady. Eger depozıtten aqsha ishinara shyǵarylǵan bolsa, onda ótemaqy saqtalǵan depozıttiń eń az qarjy qaldyǵyna esepteledi. Sondaı-aq 2022 jyldyń 23 aqpanynan keıin salymǵa tolyqtyrylǵan qarajat esepke alynbaıdy.

Eger bank salymshysynda aralyq jáne aldyn ala turǵyn úı zaımdaryn alý maqsatynda, onyń ishinde úshinshi tulǵalardyń mindettemeleri boıynsha depozıtti  qamtamasyz etý retinde berilgen bolsa, sondaı-aq atalmysh depozıt 2022 jyldyń 23 aqpanyna deıin saqtalsa, onda atalmysh salym boıynsha da ótemaqy qarastyrylady.

2023 jyldyń 6 naýryzynan bastap Otbasy bank salymshylary úshin depozıtten keıingi operasıalar qoljetimdi boldy. Atap aıtsaq bul – quqyqtar men mindetterdi berý, biriktirý, bólý/ishinara alý, tarıftik baǵdarlamany ózgertý. Buǵan deıin bul qyzmetter ótinishterdi qabyldaý jáne ótemaqy somasyn esepteý merzimi aıaqtalǵanǵa deıin ýaqytsha toqtatylǵan bolatyn.

Ótemaqy kelesi depozıtter boıynsha tólenbeıdi:

1) 2023 jyldyń 23 aqpanyna deıin (qosa alǵanda):

- jabylǵan depozıtter;

- kepil retinde bolǵan, keıin nesıe ótelip, kelisimsharty toqtatylǵan depozıtter;

- turǵyn úı zaemyna kóshken/turǵyn úı zaemy rásimdelgen, onyń ishinde avtomatty túrde kóshken depozıtter boıynsha;

  2) depozıt onlaın tabystaý qyzmeti arqyly (aqyly túrde) satylǵan nemese satyp alynǵan depozıtter boıynsha.

  3) depozıt 23.02.2023 jylǵa deıin (ámbebap quqyqqa ıe bolý tirkeýin qosa alǵanda) 10.02.2023 jylǵa deıin ótemaqy alýǵa ótinish bermegen salymshyǵa tabystalǵan jaǵdaıda.

Jalpy barlyǵy 854 myńnan astam klıent Otbasy bankindegi salymdaryna ótemaqy alýǵa ótinish bergen, onyń ishinde 63 myńnan astamy balalar salymdary boıynsha.

Ótemaqy qarajaty Otbasy bankine túskennen keıin, salymshylardyń shottaryna 2 jumys kúni ishinde aýdarylady.