Keshe Moldovadaǵy Kıshınev qalasynda opozısıalyq toptar narazylyq sherýine shyqty. Polısıa sherý reseılik arnaıy qyzmettiń arandatýymen ótti degen kúdikpen 7 adamdy ustady, dep jazady Dw.com. 

Moldovada jaryq pen jylý baǵasynyń ósýine baılanysty daǵdarys bolyp jatyr. Narazy halyq úkimetten qys aılarynda halyqtyń komýnaldyq tólemderin óteý týraly bir táýlik ishinde jaýap berýdi talap etip otyr. Olar polısıa qorshaýyn buzyp ótip, úkimet ǵımaratynyń aldyna deıin barmaq bolǵan.

Eske sala keteıik, aqpan aıynda Ýkraına prezıdenti Vladımır Zelenskıı Reseı Moldovany basyp alýdy josparlap otyrǵanyn málimdegen edi. Sodan keıin Moldova prezıdenti Maııa Sandý eldegi turaqsyzdyqqa qaýip tónip turǵanyn jáne Reseı memlekettik mekemelerge shabýyl jasaýy múmkin ekenin eskertti.