Qytaılyq kompanıalardyń Reseıge myńdaǵan myltyq, drondar men beren keýdeshege qajet jabdyqtar tasymaldaǵany belgili boldy, dep habarlady Politico basylymy.

Atalǵan jabdyqtar Reseıge 2022 jylǵy maýsym men jeltoqsan aralyǵynda jetkizilgen. Qytaıdyń qorǵanys salasyndaǵy iri merdiger kompanıalarynyń biri "China North Industries Group Corporation Limited" Reseı bıligimen baılanysy bar "Tehkrım" kompanıasyna myltyq jóneltken.

Al drondar men beren keýdeshege qajet zattardyń 12 partıasyn Qytaı Reseı shekarasyna Túrkıa arqyly tasymaldap otyrǵan. Taǵy bir qytaılyq kompanıa jeltoqsan-qarasha aılarynda Birikken Arab Ámirlikteri arqyly Reseıge dron detaldaryn jibergen.

Alaıda Ýkraınadaǵy soǵysta Reseıdiń qytaılyq myltyqtardy paıdalanyp jatqanyna dálel joq.

Eske sala keteıik, batys elderi Qytaıdy Reseıge qarý-jaraq bermeýge úgittep keledi. Buǵan deıin birqatar halyqaralyq basylym barlaý qyzmetindegi derekkózge súıenip, Pekın Máskeýge qarý berý máselesin qarastyryp jatyr dep jazǵan bolatyn. Qytaı beıtaraptyq ustanatynyn, qaqtyǵys bolyp jatqan aımaqqa qarý satpaıtynyn birneshe ret málimdegen.