Adam quqyǵy jónindegi halyqaralyq búroda saılaýǵa ózin-ózi usynǵan kandıdattardyń biri Muhtar Taıjan da baspasóz máslıhatyn ótkizip, saılaýdy moıyndamaıtynyn málimdedi, dep jazady Qamshy.kz aqparat agenttigi. Sharaǵa birqatar qoǵam belsendileri qatysty. 

Jýrnalıs Dýman Muhamedkárim jaqtastaryna birneshe ret qoqan-loqy jasalǵanyn aıtty. 

"Saılaýdyń aty shyqqaly jaqtastarymdy qorqytý–úrkitý, satyp alýǵa tyrysý bastaldy. Saılaýdaǵy zańbuzýshylyqty kórgender Ulttyq qaýipsizdikti saqtaıtyn polısıadan qorqady", dep málimdedi Dýman Muhamedkárim.

Baspasóz máslıhatynda jýrnalıs Dýman Muhamedkárim saılaý barysyndaǵy zańsyzdyqtardy kórgen azamattarmen vıdeo arqyly sóılesip, dálelderdi kórsetti. 

"Qandy qańtardan keıin evolúsıaǵa bet burǵan shyǵarmyz dep úmittengen edim. Biraq osy saılaý da ádiletsiz ótti, daýysymyz urlandy. Qazaqstannyń búkil baılyǵyn 150 olıgarh pen 2 shaldyń qolynda qaldy. Halyq dymsyz qaldy. Toqaev synaǵan "dıvan sarapshylary" ornymyzdan turaıyq. Beıbit sherý jasamasaq, bárimiz túrmede shirımiz. 120 kandıdatty naýryzdan keıingi bir kúndi belgilep, mıtıńke shyǵýǵa shaqyramyn", dep habarlady jýrnalıs. 

Sondaı-aq jýrnalıs óziniń de aldyńǵy qatardan tabylyp, mıtıńke qatysatynyn aıtyp ótti. 

"Tazy ashýyn tyrnadan alady demekshi endi Ujymdyq qaýipsizdik týraly shart uıymyn alyp kelip narazy halyqty qyryp tastaýy ábden múmkin. Biraq men aıtqanymnan qaıtpaımyn. 120 kandıdat, daıyn otyryńyzdar. Bılik  qoıylymǵa aınaldyrǵan saılaý nátıjesin kóreıik.  Hattamalaryn alyp, ózimizdiń nátıjemen salystyraıyq. Bul bılikti evolúsıa ózgertpeıdi. Sebebi olarda sana joq. Tek qana revolúsıa... Aldaǵy bir kúndi belgileıik. Eger sol ýaqytqa deıin meni qamap tastamasa, atyp tastamasa ózim aldyńǵy qatarda bolamyn", dep pikir bildirdi Dýman Muhamedkárim.