Ótken aptada Petropavlda qurylǵan separatıstik uıymnyń vıdeosy tarap, áleýmettik jelide shý shyǵardy. Keıin uıym músheleriniń qazaqstandyqtardan keshirim suraǵan vıdeosy taraǵan bolatyn. Osy oraıda qoǵam belsendisi Arman Shoraev Muhtar Taıjannyń Youtube arnasyna suhbat berip, separatıstik uıymdar jaıly pikirin aıtty.

"Buǵan deıin separatıster ár jerden bir ún shyǵaratyn. Biraq ishki organdar buǵan asa mán bergen joq. Jýyrda Atbasarda bir jigit "eger Reseı shabýyl jasasa, men Qazaqstanǵa qarsy shyǵam" dedi, biraq oǵan qarsy eshqandaı shara qoldanylmady. Sonyń nátıjesinde Petropavldaǵy oqıǵa oryn aldy. Separatıster aıtaryn aıtady da, ekinshi kúni jylamsyrap keshirim surap turady. Vıdeoda 20 shaqty adam qaýymdasqan top bolyp otyr. Bir–birin tanyǵanyna bir kún bolmaǵan shyǵar, olar aram pıǵyldaryn birneshe aı nemese birneshe jyl ortaǵa qoıyp aqyldasyp, birigip áreket jasaǵan. Menińshe, bul qylmystyq toptyń bárin bir adamdaı sotqa tartyp, jazalaý kerek"– dedi ol.

Sonymen qatar, Arman Shoraev separatıstik toptardyń artynda Reseı turǵanyn málim etti.

"Bundaı toptyń artynda Reseıdiń qulaǵy kórinip tur desem qatelespespin. Óıtkeni bizde elshilikten basqa "Rossotrýdnıchestvo" degen separatısterdi ishteı qoldap júrgen mekeme bar. Biz bilmeıtin agenttikter qanshama. Petropavldaǵy uıym – Reseıdiń aram pıǵylynyń nátıjesi. Eger bizdiń májiliste, máslıhatta ne ákimderdiń ishinde namysty azamattar otyrsa, baıaǵydan beri bundaılardyń únin óshirer edi. Ókinshike qaraı, bizdiń úkimettegiler – Reseıdiń marıonetkalary. Únsiz úkimettiń, únsiz depýtattardyń kesirinen osy jaǵdaıǵa jettik"  – dep málimdedi ol.

Suhbat barysynda til máselesin tilge tıek etken Arman Shoraev jańa depýtattardan til máselesin sheshýdi kútetinin de aıtty.  

"Ultjandy azamattardy saıası tutqyn etken bizdiń bılik separatısterdiń bas kóterýine yqpal jasaıtyn Kreml saıasatyn  qoldap kele jatyr. Bizde ulttyq ıdeologıa joq. Menińshe, ulttyq ıdeologıa arhıvimizden bastalady. Basshylary basqa tilde sóılegen qaı eldi kórdińiz? Qazaq tili tórge otyrmaı, basshylar qazaq tilinde sóılemeı, el bola almaımyz. Biz áli kúnge Reseı Federasıasynyń kolonıasymyz. Ana tilimiz esikten syǵalap turǵanda, "orys tili jylyn" jarıalaý – uıat nárse. Bizde ulttyq ıdeologıa joq. Jaqyn arada bolmaıdy da" – dep habarlady Arman Shoraev.

Sonymen qatar ol jer máselesin kóterip, Reseı men Qytaı sıaqty shekaralas elder kompanıalaryna shekara mańynan jer berilmeýi keregin aıtty.