Zeınetke shyǵýyna bes jyldan az ýaqyt qalǵan muǵalimder atestattaý rásiminen bosatylady, dep málimdedi oqý–aǵartý mınıstri laýazymynda qalǵan Ǵanı Beısembaev.  

"Muǵalimder test tapsyrmalarynyń sapasyn arttyryp, esse jazýdy alyp tastaý keregin jıi aıtady. Sondyqtan memleket basshysynyń tapsyrmasymen atestattaý formatyna ózgertý engizý josparlanýda. Sybaılas jemqorlyqqa jol bermeý úshin muǵalimderdiń materıaldaryn qaraý biryńǵaı elektrondy platformada júzege asatyn bolady. Endi tekserý adamnyń qatysýynsyz avtomatty túrde jasalady", – dedi ol.

Sonymen qatar, Beısenbaev atestattaý kezinde muǵalimderdiń qujattardy elektrondy jáne qaǵaz nusqada jınaýy, komısıanyń qujattardy qaraý merziminiń uzaqtyǵy basty másele ekenin atap ótti .

"Respýblıkalyq deńgeıde sarapshylyq toptarǵa belsendi qatysqan, 30 jyldan asa pedagogıkalyq ótili bar muǵalimder men "sheber-pedagog" sanaty bar pedagogtar, muǵalimderdiń biliktiligin arttyrý kýrstarynyń trenerleri testileýden ótpeıdi", – dedi mınıstr.

Eske sala keteıik, buǵan deıin prezıdent bilim berý máselesin kóterip, muǵalimderdiń biliktiligin arttyrýdy tapsyrǵan edi.