Energetıka mınıstri Almasadam Sátqalıev energetıka mınıstrliginiń aldynda túnegen munaıshylardyń narazylyq aksıasyn "ajıotaj jasap, nazar aýdartý úshin jasalǵan áreket" dep baǵalady. 

"Bul – ajıotaj jasap, nazar aýdartýdyń qamy. Jumyspen qamtýdy talap etken munaıshylarmen dıalog uıymdastyrylǵan bolatynbyz.  Oǵan Eńbek mınıstrliginiń ókilderi men Energetıka mınıstrliginiń departament dırektorlary qatysty"– dedi mınıstr úkimet otyrysynda.

Sonymen qatar, Sátqalıev "Ózenmunaıgaz" jáne "Qazmunaıgaz" kompanıalaryna jumysshylarmen ymyraǵa kelýdi tapsyrǵanyn aıtty. Onyń aıtýynsha, bul máseleni alańǵa shyqpaı–aq kompanıalardyń ózderi sheshýi kerek.

"Dalaǵa qoný – árkimniń óz tańdaýy. Men jeke bas múddesi úshin munaıshylardy paıdalanyp, tender nátıjesin daýlaýǵa tyrysyp jatqan kompanıa basshylyǵyna emes jeke adamdarǵa toqtalyp ótkim keledi.  Biz olardy barynsha qorǵadyq"– dep qorytyndylady Energetıka mınıstri.

Sondaı–aq, mınıstr jumysshylarǵa burynǵysynan kem emes jalaqy tóleıtin basqa jumys oryndary usynylǵanyn aıtty. Biraq munaıshylar usynystan bas tartqan.

Eske sala keteıik, "Ózenmunaıgaz" kompanıasy jarıalaǵan tenderdi "Kezbı" seriktestigi jeńip alǵandyqtan, "Ózenmunaıgaz" ben "BerÁli Mańǵystaý Company" kompanıalary arasyndaǵy kelisimshart toqtaǵan bolatyn. Sonyń saldarynan jumyssyz qalǵan munaıshylar narazylyqqa shyǵyp, Astanadaǵy Energetıka mınıstrligi ǵımaratynyń aldyna túnegen bolatyn.