11 sáýirden beri úsh otyrys ótkizgen Ulttyq kompanıa Jańaózen munaıshylarymen júrgizilgen kelissózder týraly málimdeme jasady. 

10 munaıshydan quralǵan top "Ózenmunaıgazǵa" jumysqa turý men tender ótkizýdi qaıta qaraýdy talap etken. 

Alaıda "Ózenmunaıgazǵa" jumysqa turýǵa 9 myń adam kezekte turǵandyqtan, belsendilerge ol mekemeden jumys tabý múmkin emestigi aıtyldy. Al tender týraly talapqa "QazMunaıGaz"  kompanıasy "3+2" sqemasyn usynǵan. Iaǵnı kelisimshart boıynsha úsh jyl jumys istep, kelisimshartty taǵy eki jylǵa sozýǵa bolady.  

"QMG ókilderi munaıshylardyń burynǵy jalaqysyn saqtaı otyryp, tender jeńip alǵan kompanıaǵa jumysqa alýǵa daıyn ekenin rastady. Talqylaý jalǵasyp jatyr", – dep málimdedi ulttyq kompanıa.

Kelissózge qatysýshylar táýelsiz komısıa quryp, komısıa quramy memlekettik organdarmen kelisimge kelgen soń belsendilerge naqty jaýap beretinine ýáde berdi.

Eske sala keteıik, 11 sáýirde bir top jańaózendikter Astana qalasyndaǵy Energetıka mınıstrligi ǵımaratynyń janynda pıket uıymdastyrǵan bolatyn. Olardyń narazylyqqa shyǵýyna jumyssyzdyq sebep bolǵan. "Beraly Mańǵystaý" kompanıasy tenderden utylǵandyqtan, jumys oryndarynan aıyrylǵan munaıshylar Energetıka mınıstrliginiń aldyna túnegen. Olardy 12 sáýir kúni polısıa bólimshesine alyp ketken bolatyn. 

Keıinnen mınıstrlik munaıshylardy Mańǵystaýǵa jóneltip, 10 adamnan turatyn naryzylar toby kelissóz júrgizý úshin Astanada qalǵan edi.