Petropavldaǵy separatızmdi nasıhattady dep aıyp taǵylǵan azamattarǵa qatysty saraptama nátıjesi shyqty. Halyqtyń jumysshylar keńesin qurmaq bolǵan 3 belsendi qamaýǵa alyndy. Bul týraly SQO prokýratýrasy habarlady. 

Alaıda atalǵan is boıynsha tergeý jumystary aıaqtalmaǵan. Buǵan deıin áleýmettik jelide ózderin Qazaqstannan táýelsizbiz dep jarıalap, uıym qurǵan turǵyndardyń jıyn ótkizgen vıdeosy paıda bolǵan edi. Jıynda 19 adam jańa deklarasıany, Jarǵy jobasyn, sımvolıkany, Halyq Keńesiniń mórin bekitip, 1937 jylǵy Qazaq KSR Konstıtýsıasy boıynsha ómir súretinderin aıtqan. Olar ózderin "Uly otan soǵysynda jeńiske jetken batyrlardyń urpaǵymyz" dep tanystyrǵan. 

"Separatızmdi nasıhattady dep kúdiktelgen topqa eki qylmystyq is qozǵalǵan, QR Qylmystyq kodekstiń 180-baby 2-bóligi boıynsha Qazaqstan Respýblıkasynyń birtutastyǵy men tutastyǵyn ydyratýdy nasıhattaý nemese oǵan jarıa túrde buqaralyq aqparat quraldaryn jáne telebaılanys jelilerin shaqyrýmen materıaldardy taratý jáne Qylmystyq kodekstiń 179-baby boıynsha memlekettiń qaýipsizdigin ydyratýdy úgitteý boıynsha saraptalǵan. Bul aýyr qylmystar sanatyna kiredi. Onyń sanksıasymen 10 jylǵa deıingi merzimge bas bostandyǵynan aıyrý túrindegi balamasyz jazalaý qoldanylady. Toptyń negizgi úsh fıgýranty búgin bir saǵat buryn ýaqytsha ustaý ızolátoryna qamaýǵa alyndy", - dedi SQO prokýratýrasy basqarmasynyń bastyǵy Ǵanı Jalbı.