Astananyń Baıqońyr aýdandyq soty "terorızmdi nasıhattady" dep aıyptalǵan sýretshi Dáýren Makındi jeti jylǵa bas bostandyǵynan aıyrdy.

Sýretshi ózine taǵylǵan aıypty moıyndamaıdy. Byltyr Qańtar oqıǵasynan keıin sýret, eskızder jarıalaǵanyn aıtqan sýretshi bar aıyp "sýret salýdy úırenemiz" dep kelgen arnaıy qyzmettiń adamdarymen bolǵan "áńgimege" negizdelgenin aıtady.

"Olar maǵan jala jaýyp otyr. Kinásiz ekenimdi dáleldeýge qansha tyrysqanymmen, eskergen joq. Facebook paraqshamda eldegi saıası oqıǵalarǵa qatysty pikir jarıaladym. Soǵan baılanysty sottap otyr. Úkimge kelispeımin, apelásıaǵa beremin" – dedi Dáýren Makın sottan keıin jýrnalısterge bergen jaýabynda.

Byltyr sýretshiniń advokaty men jaqyndary Makınge sýret salýdy úırenemiz degen syltaýmen eki adam kelip, ortadaǵy áńgimeni dıktofonǵa jazyp alǵanyn aıtqan edi. Keıin olardyń arnaıy qyzmet adamdary ekeni  anyqtalǵan. "Bar aıyp sol áńgimege negizdelgen" deıdi qorǵaýshylar taraby. 

Ulttyq qaýipsizdik komıteti sýretshi Makınniń tutqyndalýyna qatysty jaýap berýden bas tartqan.

Eske sala keteıik,  Dáýren Makınniń "Naýryz", "Master" kartınalary Astanadaǵy tarıhı mýzeıge qoıylǵan. Ony áriptesteri ulttyq, tarıhı taqyryptarǵa kóp kartına salǵan sýretshi retinde sıpattaıdy.