Abaı oblysynda jastarǵa shaǵyn nesıe berý baǵdarlamasy boıynsha ótinimder qabyldaýda.
Memleket basshysy Qasym-Jomart Kemeluly Toqaevtyń tapsyrmasy aıasynda «Agrarlyq nesıe korporasıasy» AQ jastarǵa shaǵyn nesıe berý baǵdarlamasy boıynsha ótinimder qabyldaýdy jalǵastyrýda. Ótinimderdi qabyldaý bıylǵy jyldyń naýryz aıynan bastaldy jáne osy aralyqta Abaı oblysy boıynsha jas kásipkerlerden jeńildetilgen jyldyq 2,5 paıyzben mıkrokredıt alýǵa 86 ótinish kelip túsken.
Atap aıtsaq, 71 ótinim mal sharýashylyǵyn, 9 ótinish qyzmet kórsetý salasyn, 3 ótinish saýda, 3 ótinish jeńil ónerkásip salasyn qarjylandyrý boıynsha túsken. 2023 jyly Abaı oblysy boıynsha keminde 211 nesıe berý josparlanýda. Bul maqsatta 1 mlrd. 55 mln. teńge bólingen.
– Mıkrokredıtter 5 jyldan aspaıtyn merzimmen (mal sharýashylyǵy salasyndaǵy jobalar úshin 7 jylǵa deıin) jeke kásipker retinde tirkelgen 21 jastan 35 jasqa deıingi jastarǵa óz isin ashý nemese keńeıtý úshin beriledi. Bul rette qatysýshylardyń jasy «Agrarlyq kredıttik korporasıa» AQ-ǵa ótinimmen júgingen kezde eskeriledi. Aınalym qarajatyn toltyrýǵa beriletin nesıeniń merzimi – 24 aıǵa deıin, kóktemgi egis jáne egin jınaý jumystaryn qarjylandyrý merzimi - 36 aıǵa deıin. Aınalym qarajatyn 100 paıyz toltyrýǵa ruqsat berilmeıdi, nesıeniń bir bóligi ǵana baǵyttalýy múmkin, – deıdi «Agrarlyq nesıe korporasıasy» AQ-nyń Abaı oblystyq fılıalynyń nesıe bóliminiń basshysy Tımýr Akataev.
Kepil retinde respýblıkalyq, oblystyq mańyzy bar qalalarda, aýdan ortalyqtarynda, oblystyq jáne aýdandyq baǵynysty qalalarda jáne ózge de eldi mekenderde ornalasqan jyljymaıtyn múlik, egistik jer jáne arnaıy tehnıka qarastyrylady. Qaryz alýshylarǵa qoıylatyn negizgi talaptardyń biri – nesıe tarıhynyń jaqsy bolýy. Ótken eki jylda ótelmegen nesıe merzimi 180 kúnnen aspaýy kerek.
Nesıeni qarjylandyrý týraly sheshimdi oblys ákimdigi janynan qurylǵan konkýrstyq komısıa shyǵarady. Komısıa jumysy 26 sáýirden bastaldy. Búgin ótken alǵashqy otyrysta 10 ótinish qaralyp, úmitkerler óz bıznes jobalaryn tanystyrdy. Bıznes-jospardy baǵalaý paraǵyna sáıkes joǵary upaı jınaǵan kásipkerlerdiń jobalary qarjylandyrylatyn bolady.
Komısıaǵa alǵashqy bolyp jobasyn usynǵandardyń biri Jarma aýdany Arshaly aýylynan kelgen 25 jastaǵy kásipker – Qýanyshbek Jeldibaev.
– Aýylda óz qojalyǵym bar. Óz isimdi bıyl aqpan aıynda bastadym. 4 mln. 900 myń teńgege 14 bas iri qara mal satyp alý úshin jeńildetilgen nesıege ótinim berip otyrmyn. Aýylda óskendikten, maldyń jaı-kúıin bilemin. Oǵan qosa Shákárim ýnıversıtetinde veterınarıa mamandyǵynda bilim alǵanmyn. Aýylda veterınar retinde de jumys isteımin. Bul baǵdarlamada nesıe mólsherlemesiniń tómen bolýy jastar úshin óte tıimdi, – deıdi Qýanyshbek Jeldibaev.
Abaı oblysynyń jumyspen qamtý jáne áleýmettik baǵdarlamalardy úılestirý basqarmasy basshysynyń orynbasary Aıman Nurlybektiń aıtýynsha, aldymen, bıznes-josparlardyń óńirdiń áleýmettik-ekonomıkalyq damýyna qosatyn úlesi baǵalanady.
Aıta keteıik, komısıanyń kelesi otyrysy mamyr aıynyń ortasyna josparlanǵan.
Qazirgi ýaqytta Abaı oblysy boıynsha shaǵyn nesıe alýǵa ótinimder Semeı qalasy, Muhamedhanov kóshesi, 23 a mekenjaıynda ornalasqan «Agrarlyq nesıe korporasıasy» AQ-nyń Abaı oblysy boıynsha fılıalynda qabyldanýda.
